Avqustun sonunadək Azərbaycanda 300 yeni "MilliÖn" ödəniş terminalı quraşdırılacaq.

Bunu "MilliÖn"ün abunə şöbəsinin rəhbəri Ülviyyə Əfəndiyeva deyib.

Onun sözlərinə görə, bugünədək işlərin 70 faizi başa çatıb, 30 faizi isə bu ayın sonunadək başa çatdırılacaq. Yeni ödəniş terminalları  paytaxtda və regionlarda əsasən alış-veriş və biznes mərkəzlərində, bank filiallarında, dövlət xidmət mərkəzlərində, piyada keçidlərində, metro stansiyalarında, supermarketlərdə, hava limanlarında, avtobus dayanacaqlarında yerləşdirilir:

"MilliÖn" şəbəkəsinin əsas məqsədi əhaliyə ani, rahat və keyfiyyətli ödəniş xidmətləri təqdim etməkdir. Azad edilmiş ərazilərdə də "MilliÖn" terminallarının quraşdırılmasına hazırlıq gedir. Bundan başqa, Azərbaycanın bütün region və şəhərlərində ödəniş terminallarının sayının artırılması üzrə layihə reallaşdırılır".

Yeni terminallar əsasən əhalinin sıxlıq təşkil etdiyi və yeni terminallara tələbin olduğu Sumqayıt şəhərində və Bakının Yasamal və Binəqədi rayonlarında quraşdırılır.

Azad edilmiş ərazilərdə də "MilliÖn" terminallarının quraşdırılmasına hazırlıq gedir.

Quraşdırılacaq terminallar vasitəsi ilə 400-dən artıq digər ödəniş növü ilə yanaşı Bakı ərazisində Bakı Kart, Sumqayıt şəhərində isə Sumqayıt Kart ödənişlərini də həyata keçirmək mümkün olacaq.

Şirkətin nümayəndəsi yeni quraşdırılacaq terminalların ödəniş prosesini daha da əlçatan edəcəyini və nəqliyyat xidmətinin sürətlə kart ödənişlərinə keçmə prosesi fonunda ödəniş məntəqələrinə artan ehtiyacı xeyli azaldacağını, sərnişinləri nəqliyyat kartı balansının doldurulması problemindən azad edəcəyini bildirib.

Qeyd edək ki, hazırda MilliÖN ödəniş şəbəkəsində 200-dən artıq şirkətin 400-dən artıq xidmət növü ödənişləri mövcüddur. MilliÖN ödəniş terminallarının sayı isə 4000-nə yaxındır. 

MilliÖN terminallar şəbəkəsinin operatoru Komtec şirkətidir.

Telegramda Marja.az səhifəsinə abunə olun

Trend