Bu ilin yanvar-iyun aylarının yekununa görə, Azərbaycandakı 20 sığorta şirkətindən 13-nün yığımları illik müqayisədə artıb, 5-nin yığımları azalıb, 2 şirkət (“Aqrar Sığorta Müştərək Sığorta Şirkəti” və “Meqa Həyat Sığorta” ASC-lər) ötən ilin yanvar-iyun aylarında bazarda olmadığı üçün onların yığımlarında dinamika qeydə alınmayıb.

Bu barədə Azərbaycan Mərkəzi Bankının açıqladığı statistik hesabatda bildirilir.

Hesabata əsasən, son 1 ildə yığımları illik müqayisədə ən çox artan şirkət "Bakı Sığorta" ASC-dir. Bu şirkət 6 ay ərzində 2 milyon 233 min manat sığorta haqqı toplayıb ki, bu da 1 il əvvələ nisbətən 3,1 dəfə çoxdur. Daxilolmaları ən az artan şirkət isə “PAŞA Sığorta” ASC-dir. Bu şirkətin daxilolmaları 105 milyon 766 min manat təşkil edib ki, bu da 1 il əvvələ nisbətən 5,5% çoxdur.

Yığımları azalan şirkətlər arasında ən pis vəziyyət “İpək Yolu Sığorta” ASC-dədir. Bu şirkətin daxilolmaları 22,4% azalaraq 7 milyon 303 min manat olub. Yığımlarda azalma baxımından ən yaxşı vəziyyət isə “Xalq Sığorta” ASC-dədir. Bu şirkətin daxilolmaları 1,9% azalaraq 13,04 milyon manata düşüb. 

11 sığorta şirkətinin ödənişləri artıb

Bu ilin yanvar-iyun aylarının yekununa görə, Azərbaycandakı 20 sığorta şirkətindən 11-nin ödənişləri illik müqayisədə artıb, 6-nın ödənişləri azalıb, 3 şirkət (“Aqrar Sığorta Müştərək Sığorta Şirkəti”, “Xalq Həyat Sığorta” və “Meqa Həyat Sığorta” ASC-lər) ötən ilin eyni dövründə ödəniş etmədiyi üçün onların ödənişlərində dinamika qeydə alınmayıb.

Hesabata əsasən, son 1 ildə ödənişləri ən çox artan şirkət “Naxçıvan Sığorta” ASC-dir. Bu şirkət 6 ay ərzində  138 min  manat ödəniş edib ki, bu da 1 il əvvələ nisbətən 33 dəfə çoxdur. Ödənişləri ən az artan şirkət isə “Atəşgah Həyat Sığorta" ASC-dır. Bu şirkətin ödənişləri 19 milyon 239 min manat təşkil edib ki, bu da illik müqayisədə 18,7% çoxdur.

Ödənişləri azalan şirkətlər arasında ən pis vəziyyət "Meqa Sığorta" ASC-dədir. Bu şirkət 6 ay ərzində 2 milyon 135 min manat ödəniş edib ki, bu da 1 il əvvələ nisbətən 2,1% azdır. Ödənişlərdə azalma baxımından ən yaxşı vəziyyət isə “İpək Yolu Sığorta” ASC-dədir. Bu şirkətin ödənişləri 39,8% azalaraq 1 milyon 191 min manata düşüb. 

Marja.az Telegramda: https://t.me/marjaaz

"Renkinq"