"Azərbaycan Sənaye Bankı" ASC 2021-ci ilin 1-ci yarısını (yanvar-iyun dövrünü) 1 milyon 113 min manat xalis mənfəət ilə başa vurub. Halbuki, Bank ötən ilin eyni dövrünü 3 milyon 368 min manat xalis mənfəət ilə bağlamışdı. Beləliklə, "Azərbaycan Sənaye Bankı"nın xalis mənfəəti 3 dəfə azalıb. Mənfəətin azalmasının səbəbləri faiz gəlirlərinin azalması və bu il ehtiyatdan vəsaitin azad olmaması, əksinə ehtiyata ayırma edilməsilə əlaqədardır. 

Marja Bankın maliyyə hesabatına istinadən xəbər verir ki, 2020-ci ilin yanvar-iyun dövründə 16 milyon 132 min manat təşkil etmiş faiz gəlirləri 2021-ci ilin eyni dövründə 14 milyon 359 min manata düşüb (1 milyon 773 min manat və ya 11% azalıb). Qeyri-faiz gəlirləri isə 2 milyon 780 min manatdan 2 milyon 964 min manata yüksəlib (184 min manat və ya 6,6% artıb). 

2021-ci ilin ilk 6 ayında "Azərbaycan Sənaye Bankı"nın cəmi əməliyyat gəlirləri (faiz və qeyri-faiz gəlirləri) 17 milyon 323 min manat, cəmi əməliyyat xərcləri (faiz və qeyri-faiz xərcləri) 15 milyon 444 min manat, gəlirlər xərcləri üstələdiyindən əməliyyat mənfəəti 1 milyon 879 min manat təşkil edib. Bank əməliyyat mənfəətindən 483 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırıb, 283 min manat mənfəət vergisi ödəyib. Beləliklə, "Azərbaycan Sənaye Bankı" ilk 6 ayı 1 milyon 113 min manat xalis mənfəət ilə başa vurub.

Xatırladaq ki, 2020-ci ilin ilk 6 ayında "Azərbaycan Sənaye Bankı"nın cəmi əməliyyat gəlirləri 18 milyon 913 min manat, cəmi əməliyyat xərcləri 15 milyon 521 min manat, gəlirlər xərcləri üstələdiyindən əməliyyat mənfəəti 3 milyon 392 min manat təşkil etmişdi. Eyni zamanda, aktivlər üzrə mümkün zərərlərin ödənilməsi üçün xüsusi ehtiyatdan azad olmuş 805 min manat mənfəətə əlavə edilmiş və mənfəət 4 milyon 198 min manata yüksəlmişdi. Bank 830 min manat mənfəət vergisi ödədiyindən həmin dövrü 3 milyon 368 min manat xalis mənfəət ilə bağlamışdı.

KREDİTLƏR AZALIB

30 İyun 2021-ci il tarixində "Azərbaycan Sənaye Bankı" ASC 864 milyon 683 min manat cəmi aktivlərə, o cümlədən 256 milyon 59 min manat kredit portfelinə malik olub. Bank 2020-ci ilin sonunda 911 milyon 504 min manat cəmi aktivlərə və 316 milyon 991 min manat kredit portfelinə malik idi.  Aktivlərin azalması Mərkəzi Bankda müxbir hesabın, "Nostro" hesabların və müştərilərə verilmiş kreditlərin azalması ilə əlaqədardır.

DİGƏR BANKLARDAKI DEPOZİTLƏRİ ARTIB

İlk 6 ayda "Azərbaycan Sənaye Bankı"nın digər banklardakı depozitləri 51 milyon 618 min manata artaraq 495 milyon 656 min manata çatıb. Ötən ilin sonunda Bankın digər banklardakı depozitləri 444 milyon 38 min manat təşkil etmişdi.

Ötən ilin sonunda "Azərbaycan Sənaye Bankı"ndakı depozitlər (depozit portfeli) 639 milyon 932 min manat ikən, 30 İyun 2021-ci il tarixinədək 590 milyon 119  min manata düşüb.

MƏCMU KAPİTALI 100 MİLYON MANATDAN ÇOXDUR

30 İyun 2021-ci il tarixində "Azərbaycan Sənaye Bankı" 100 milyon 546 min manat məcmu kapitala malik olub. Bank ötən ilin sonunda 101 milyon 528 min manat məcmu kapitala malik idi.