"Embafinans" Bank Olmayan Kredit Təşkilatı (BOKT “Embafinans” QSC) 1,5 milyon manatlıq istiqraz buraxır.

Marja xəbər verir ki, bu emissiya hər birinin nominal dəyəri 1000 manat olan 1 500 ədəd faizli, təminatsız, sənədsiz, adlı istiqrazlardan ibarətdir. 

İstiqrazlar üzrə gəlirliyin faiz dərəcəsi illik 10.5%-dir.

İstiqrazların ödənilmə müddəti buraxılışda olan ilk istiqrazın yerləşdirildiyi tarixdən etibarən 1 təqvim ilidir. İstiqrazlarüzrə ödənilməli olan faizlər buraxılışda olan ilk istiqrazın yerləşdirildiyi tarixdən etibarən dövri olaraq hər 1 təqvim ayından bir ödəniləcəkdir. İstiqraz sahiblərinə istiqrazlar üzrə əsas məbləğin ödənişi tədavül müddətinin sonunda – ilk istiqrazın yerləşdirildiyi tarixdən 1 (bir) təqvim ili sonra həyata keçiriləcəkdir. 

Yerləşdirmənin anderrayteri “ABB-İnvest İnvestisiya şirkəti” QSC-dir.

"Embafinans" istiqraz təklifinin səbəbləri - kredit məhsullarına tələbin artması fonunda istiqraz buraxmaqla daha sərfəli şərtlərlə vəsait cəlb edib əhalinin və bzines subyektlərinin kredit tələblərini təmin etmək və bazara daha rəqabətli şərtlər təqdim etməkdir.

Essiya ediləcək istiqrazlar Azərbaycan Respublikasının Mərkəzi Bankı tərəfindən dövlət qeydiyyatına alındıqdan sonra yerləşdirmənin başlanmasına ən azı 2 iş günü qalmış hərracın baş tutacağı tarix Bakı Fond Birjasının saytında investorlara açıqlanacaqdır.

BOKT “Embafinans” QSC əsasən riteyl və mikro biznes kredit bazarında fəaliyyət göstərir. Hazırki dövrdə kredit təşkilatlarına əsas təsir edən faktorlar olan valyuta riskləri və portfel keyfiyyəti kimi faktorlar BOKT “Embafinans” QSC-də qənaətbəxş idarə olunur. Belə ki təşkilatın portfelində prospektin hazırlandığı tarixə valyuta riski yaradacaq kreditlər yoxdur və kredit portfeli milli valyutada formalaşdırılmışdır. Kredit portfelinin 30 gündən çox gecikmə nisbəti göstəricisi 11% ətrafında idarə olunur.

"Embafinans" 2021-ci ildə 9 milyon 909 min manat, 2022-ci ildə isə 12 milyon 446 min manat gəlir proqnozlaşdırır.

Həmçinin oxu

“Embafinans”ın faiz gəlirləri artıb – MALİYYƏ VƏZİYYƏTİ