İyunun 2-də ADA Universiteti ilə Azərbaycan Beynəlxalq Bankı arasında əməkdaşlıq haqqında memorandum imzalanıb.

Memorandumu ADA Universitetinin İcraçı prorektoru Fariz İsmayılzadə və Azərbaycan Beynəlxalq Bankının İdarə Heyətinin sədri Abbas İbrahimov imzalayıb.

Sənədin əsas məqsədlərindən biri Bankın strateji fəaliyyət istiqamətləri üzrə müxtəlif mövzulara dair elmi tədqiqatların aparılması, birgə konfrans və tədbirlərin keçirilməsi, bank əməkdaşları üçün fərqli dərəcə və ixtisasartırma proqramlarının həyata keçirilməsidir. Eləcə də ADA-nın yüksək bilik və bacarığı ilə fərqlənən məzunlarının işlə təmin edilməsi də əsas məqsədlər sırasındadır. Memoranduma əsasən, universitetin “Big Data” Mərkəzinin rezident tələbələri ilə Bankın müvafiq birgə layihələri reallaşdırılacaq. Əməkdaşlıq çərçivəsində məlumat və təcrübə mübadiləsinin həyata keçirilməsi də nəzərdə tutulub.

Əməkdaşlıq çərçivəsində birgə layihə-konstruktor işlərinin aparılması, habelə elmi və elmi-texniki konfransların təşkili, məlumat və təcrübə mübadiləsinin həyata keçirilməsi də nəzərdə tutulub.

Sənədi imzalayan ADA Universitetinin İcraçı prorektoru Fariz İsmayılzadə davamlı inkişafa nail olmaq üçün milli kadrların yetişdirilməsinin vacibliyini vurğulayaraq bildirib ki, ADA Universiteti müasir iş mühitinin sürətlə dəyişən tələblərini nəzərə alaraq bir çox xarici universitetlərlə ikili diplom proqramları təqdim edir. Eyni zamanda iri şirkətlərlə əməkdaşlığını durmadan genişləndirir: “Azərbaycan Beynəlxalq Bankı ilə əməkdaşlıq gənclərin inkişafı üçün yeni fürsət və imkanlar təqdim edəcək. Universitetin akademik, Bankın isə praktik təcrübəsi yüksək ixtisaslı kadrların yetişdirilməsini sürətləndirəcək”, - deyə prorektor F.İsmayılzadə əlavə edib.

Azərbaycan Beynəlxalq Bankının İdarə Heyətinin sədri Abbas İbrahimov isə Bankın strateji inkişaf planından bəhs edərək rəqəmsal bankçılıq, korporativ idarəetmə, davamlı və rəqabətədavamlı biznes modelinin tətbiq edilməsi üzrə əldə olunan təcrübə və nailiyyətlərə diqqət yönəldib: “Ən qabaqcıl yenilikləri ölkəmizə gətirməklə yanaşı, biz insan kapitalının dəstəkləməsinə, istedadlı insanlara inkişaf mühitinin yaradılmasına da böyük önəm veririk. Yüksək potensiala malik gəncləri işə cəlb edib onların peşəkar inkişafına kömək göstərməklə ölkəmizin iqtisadi inkişafına əlavə dəyər qazandırmağı hədəfləyirik. ADA Universiteti ilə genişlənən əməkdaşlığımız bu istiqamətdə yeni imkanlar yaradacaq”- deyə A.İbrahimov vurğulayıb.