2021-ci il yanvar-mart aylarında Gəncə şəhərində sənaye istehsalı haqqında məlumatlar açıqlanıb.

Gəncə Şəhər Statistika İdarəsindən Marja-ya verilən məlumata görə, şəhərdə traktor, yük avtomobili və kənd təsərrüfatı texnikası, elektron və mexaniki su sayğacları istehsalı müəssisələri fəaliyyət göstərir.

2021-ci ilin yanvar-mart aylarında Gəncə şəhərinin sənaye müəssisələri və fiziki şəxslər tərəfindən faktiki qiymətlərlə 118,2 milyon manatlıq sənaye məhsulu istehsal edilmiş və sənaye xarakterli xidmətlər göstərilmişdir. Sənayedə muzdla çalışan 5615 nəfər işçiyə verilən (bir nəfərə düşən) orta aylıq əməkhaqqı 555,6 manat təşkil etmişdir. Dövlət sənaye müəssisələrində işçilərin orta aylıq əməkhaqqı 537,7 manat, qeyri-dövlət sənaye müəssisələrində 573,9 manat təşkil etmişdir. 

Emal sektorunun müəssisələri tərəfindən 109,3 milyon manatlıq (o cümlədən 102,9 milyon manatı qeyri-dövlət sektoru tərəfindən) məhsul istehsal edilmiş və sənaye xarakterli xidmətlər göstərilmişdir. Bundan qida məhsulları istehsalı 30,7 milyon manat, içki istehsalı 3,6 milyon manat, metallurgiya sənayesi məhsulları 62,9 milyon manat, avtomobil, qoşqu və yarımqoşquların istehsalı 6,6 milyon manat və digər məhsulların istehsalı 5,5 milyon manat təşkil etmişdir. Yanvar-mart ayları ərzində 22777,3 ton un, 286,9 ton makaron, 57,4 min dekalitr araq, 38,0 min dekalitr şərab, 90 ədəd traktor, 7 ədəd MAZ yük avtomobili, 3,4 ton emal edilməmiş alüminium ərintiləri (ilkin şəkildə), 1 ədəd sair qoşqular, 4306 ədəd elektron və 58857 ədəd mexaniki su sayğacları istehsal edilmişdir.

Elektrik enerjisi, qaz, buxar istehsalı, bölüşdürülməsi və təchizatı sektorunun müəssisələri tərəfindən 2021-ci il yanvar-mart ayları ərzində 6,4 milyon manatlıq, su təchizatı, tullantıların təmizlənməsi və emalı sektorunda 2,4 milyon manatlıq məhsul istehsal edilmiş və xidmətlər göstərilmişdir.