(®️) Son illərdə QR-koddan istifadə hər yerdə tətbiq edilən innovativ onlayn tendensiyadan sistemli maliyyə prosesinə çevrilmişdir. Əgər daha öncədən biz hər-hansı bir informasiyanı əldə etmək üçün QR-kodu skan edirdiksə, son bir neçə ildə dünyada bu üsulla ödəmələr həyata keçirmək daha da aktuallaşıb.

QR-kodun əsas üstünlüyü istifadəçi məlumatlarının effektiv saxlanması, əlavə yükləyicilər, torrent və s. olmadan məlumatları yükləmək üçün açıq bir kanal təmin etməsidir. İnternetə çıxışı olan hər bir smartfon kodu skan edərək istədiyi informasiyanı əldə edə bilir. Ödəmə üsulu üçün ideal funksiyadır, elə deyil mi?

Çin mobil ödəmə sistemi olan “Alipay” Avropada 6 mobil pul qabı ilə birlikdə avropa və çin turistləri üçün unikal ödəmə üsulu hazırlayır. Söhbət özəyində QR-kod duran bir sistemdən gedir. Bluecode, ePassi, Momo Pocket, Pagaqui, Pivo, Vipps və Alipay şirkətləri birləşərək Avropada dağınıq halda olan mobil ödəməni yekdil bir sistem halına salmağa çalışırlar. Tezliklə bu mobil pul qabıların istifadəçiləri Avropanın 10 ölkəsində dəstəklənən QR-kod vasitəsilə ödəmələrini həyata keçirə biləcəklər.

Bu rəqəmsal pul qabılarını dəstəkləyən sahibkarlar digər ölkələrdən də ödəmələri qəbul edə biləcəklər. Bununla yanaşı, “Alipay” istifadəçiləri də xüsusi QR-kod vasitəsilə ödəmələrini həyata keçirə biləcəklər. Məlumatlara əsasən, 6 avropa istehsalı olan mobil pul qabıların 5 milyona yaxın istifadəçisi və 190 minə yaxın müştərisi vardır.

"Bütün dahiyanə fikirlər, əslində, sadədir". Ona görə də uğur əldə edir.

2019-cu ilin dekabr ayından dünyanı pandemiya dalğası bürüdüyündən insanlar həm bir-biriləri ilə, həm də nağd pullarla az təmasda olurlar. Statistika göstərir ki, ölkəmizdə nağdsız ödənişlərin sayı nisbətən daha da artıb və fiziki pullar arxa plana keçməkdədir. QR-kod vasitəsilə həyata keçirilən ödənişlər yalnız cəldliyi, rahatlığı ilə deyil, həm də təhlükəsizliyi ilə fərqlənirlər.

Çin artıq uzun müddətdir ki QR-kod ilə ödənişlərə keçib. İnsanlar WeChat proqramı vasitəsilə pul vəsaitlərini bank hesablarından proqrama köçürərək ödənişlərini QR-kod olan lövhələri skan etməklə həyata keçirirlər. Beləliklə, bir Çinli fermer maraqlı tərzdə tərəvəz yetişdirərək Ginnesin rekordlar kitabına düşüb. Toxumları öz sahəsində elə əkib ki, quş uçuşu hündürlüyündən bu forma onun WeChat tətbiqindəki QR-kodunun kontur cizgiləri ilə eyni olub.

Yeni eraya keçid etmək zamanıdır!