"PAŞA Bank Türkiyə" silinmə tarixi (nominalın geri ödənişi) 22 dekabr 2022-ci il tarixi  olan istiqrazları üzrə illik 4,85% olmaqla 303.125 ABŞ dolları həcmində sayca 12-ci olan növbəti rüblük kupon ödənişini həyata keçirib. İndiyədək investorlara ümumilikdə 3,940,625 ABŞ dolları məbləğində faiz gəliri ödənilib.

Qeyd olunmalıdır ki, istənilən investisiyanın təhlilində 3 əsas meyar nəzərə alınır:

Təhlükəsizlik - Bankın rəsmi internet səhifəsində 30 sentyabr 2020-ci il tarixinə olan hesabata əsasən, 1987-ci ildən fəaliyyət göstərən Bankın nizamnamə kapitalı 500 milyon türk lirəsi təşkil edir. Bankın əsas səhmdarları kimi PAŞA Bank Azərbaycan ASC (50,96%) və PAŞA Holding MMC (49,00%) çıxış edir. Hesabat tarixinə Bankın aktivləri 2,22 milyard lirədən artıq, gecikmədə olan kredit portfelinin ümumi portfelə nisbəti 2,5%, kapitalın adekvatlıq göstəricisi isə 25,0% təşkil edir (mənbə: www.pashabank.com.tr/Investor Relations / Investor Relations Presentation).

Likvidlik – Geri ödəniş tarixinə qalan müddətin 2 il olduğunu nəzərə alaraq, təkrar bazarda da likvidlik nümayiş etdirir.

Bakı Fond Birjasının rəsmi statistkasına əsasən 2020-ci il ərzində 1 245 ədəd istiqraz üzrə 1 289 min ABŞ dolları həcmində əqd keçirilmişdir. (Mənbə: https://www.bfb.az/az/baki-fond-birjasnda-dovri-statistika)  Əlavə olaraq, bu kağızlar Bakı Fond Birjasının repo predmeti olan qiymətli kağızların siyahısına əlavə olunub və hal-hazırda bu qiymətli kağızlar Azərbaycan Respublikası Dövlət Neft Şirkətinə məxsus istiqrazlardan (5%) sonra ən az girov üzrə təminat (haircut) tələb edən (10%) istiqrazlardır. (Mənbə: https://www.bfb.az/az/view-file/repo-predmetinin-siyahisi-1.pdf). Bu isə o deməkdir ki, bu kağızları satıb yüksək gəlirliliyi itirmədən kağızı girov qoyub, qısa müddətli və gəlirlilik dərəcəsindən aşağı faizlə vəsait cəlb etmək mümkündür.

Gəlirlilik - Nominal dəyəri 1 min ABŞ dolları olan  bir istiqraz üzrə illik 4,85% təşkil edən kupon ödənişi  rüblük həyata keçirilir. Azərbaycan Respublikası Mərkəzi Bankının açıqladığı statistik məlumatlara əsasən, 01.11.2020-ci il tarixinə banklarda xarici valyutada yerləşdirilmiş depozitlər üzrə faiz dərəcələri müqavilə müddəti 9 aydan 1 ilədək olanlar üzrə ortalama illik 1,05%, müqavilə müddəti 1 ildən 5 ilədək olanlar üzrə isə ortalama illik 1.91% təşkil etmişdir (mənbə: Azərbaycan Respublikasının Mərkəzi Bankı / Pul-kredit statistikası / 3.2 Depozit və kreditlər üzrə orta faiz dərəcələri).

Növbəti kupon ödənişi 22 mart 2021-ci il tarixində baş tutacaq. İstiqrazları əldə etmək üçün PAŞA Kapital investisiya şirkətinə müraciət edə bilərsiniz. Əlaqə nömrəsi: + (994) 12 493 33 66.