“Dağlıq Qarabağda atəşkəsin sonuncu pozulmasından sonra belə halların baş verməyəcəyinə ümidvaram”.

Bunu Rusiya prezidenti Vladimir Putin illik mətbuat konfranda bildirib.

Rusiya lideri 9 noyabr razılaşmasının Qarabağda qan tökülməsinə son qoyduğunu xatırladıb: “İnsanlar artıq ölmür, bu da prinsipial məsələdir, həll etdiyimiz ən mühüm məsələdir. Silahlı qüvvələr olduqları yerdə dayandıqları üçün həm Azərbaycan, həm də Ermənistan tərəfi üçün infrastruktur səciyyəli müəyyən çətinliklər yarandı, bunlar danışıqlar əsnasında sakit aydınlaşdırılmalıdır, çünki üçtərəfli bəyanat bunun üçün hər cür imkanlar yaradır. Orada yazılıb ki, atəşkəs əldə ediləndən sonra növbəti mərhələdə regionda münasibətlər tam yoluna qoyulmalı, iqtisadi və infrastruktur potensialı üzə çıxarılmalıdır. Bunlar Naxçıvana da aiddir, Ermənistanın şimalı ilə cənubu arasındakı gediş-gəlişə də”.

Bölgədə rusiyalı sülhməramlıların sayının artırılmasına gəlincə, V.Putin deyib: “Bu, mümkündür, amma yalnız tərəflərlə, o cümlədən Azərbaycan tərəfi ilə razılaşdırılması şərtilə. Yəni bu, sırf texniki məsələdir. Bunun zəruri olmasına hamı qərar versə, bunu edərik, əks təqdirdə isə yox”.

ERMƏNİLƏR MƏSƏLƏNİ SAKİT HƏLL ETMƏMƏYƏ CƏHD EDİRLƏR

Erməni mətbuatı Rusiya Prezidenti Vladimir Putinin bugünkü açıqlamasına istinad edərək yazır ki, Ermənistan silahlı qüvvələrinin və könüllülərin Sünik yaxınlığındakı mövqelərdən çəkilməsi üçün heç bir əsas yoxdur. Rusiya tərəfi, üçtərəfli bəyanatın şərtlərinin yerinə yetirilməsinin qarantı olaraq, imzalanma zamanı işğal olunmuş mövqelərdə qüvvələrin dayanmasına nəzarət etməlidir.

Rusiya Prezidenti Vladimir Putin, illik mətbuat konfransında bildirib ki, üçtərəfli Atəşkəs Bəyanatına görə, tərəflər imza atma anında olduqları mövqedə qalmalıdır.

Ermənilərə görə, bu məsələ, bugünkü Sünik hadisələri kontekstində əhəmiyyət kəsb edir. Üçtərəfli bəyanatda yalnız Kəlbəcər, Laçın və Ağdam rayonlarının Azərbaycanın nəzarətinə verilməsindən bəhs olunur, qalan bölgələrdən bəhs edilmir.

İddia olunur ki, Azərbaycan Ordusu Zəngilan və Qubadlıda əraziləri Ermənistan sərhədinə qədər işğaldan azad edə bilməyib, buna görə çatdıqları yerdə qalmalıdırlar. Xüsusilə, Süniklə həmsərhəd olan Zəngilan və Qubadlının bölgələrindən söhbət gedir. Lakin bu günlərdə Azərbaycan Silahlı Qüvvələri erməni tərəfdən Süniklə həmsərhəd olan mövqelərini tərk etmələrini tələb edir.

“Report”, Marja