“Günay Bank” ASC 2020-ci ilin 9 ayı üzrə maliyyə göstəricilərini açıqlayıb. Bankın xalis mənfəəti mümkün zərərlər üçün yaradılan məqsədli ehtiyatlara ayırmanın artması ilə əlaqədar olaraq azalsa da, biznes fəaliyyətinin nəticəsini daha həqiqi əks etdirən əməliyyat mənfəəti artıb.

GƏLİRLƏRİ ARTIB, XƏRCLƏRİ AZALIB

Marja xəbər verir ki, 2020-ci ilin 9 ayı ərzində Günay Bankın cəmi əməliyyat gəlirləri 14 milyon 661 min manat, cəmi əməliyyat xərcləri 12 milyon 331 min manat təşkil edib. Gəlirlər xərcləri üstələdiyindən Bankın 2 milyon 330 min manat əməliyyat mənfəəti yaranıb. Bank əməliyyat mənfəətin 2 milyon 83 min manatını mümkün zərərlər üçün yaradılan məqsədli ehtiyatlara ayırdığından cari ilin 9 ayını 247 min manat xalis mənfəət ilə bağlayıb.

Müqayisə üçün qeyd edək ki, 2019-cu ilin 9 ayında Günay Bankın cəmi əməliyyat gəlirləri 14 milyon 295 min manat, cəmi əməliyyat xərcləri 12 milyon 503 min manat, əməliyyat mənfəəti 1 milyon 792 min manat təşkil etmişdi. Bank əməliyyat mənfəətin 780min manatını mümkün zərərlər üçün yaradılan məqsədli ehtiyatlara ayırdığından ötən ilin 9 ayını 1 milyon 12 min manat xalis mənfəət ilə bağlamışdı.

“Günay Bank” ASC-nin faiz gəlirləri artıb, eyni zamanda faiz xərcləri azalıb. Ötən ilin 9 ayında 8 milyon 903 min manat təşkil etmiş faiz gəlirləri cari ilin 9 ayında 9 milyon 650 min manat təşkil edib. Bankın faiz xərcləri isə 6 milyon 579 min manatdan 5milyon 870 min manata düşüb.

Günay Bankın qeyri-faiz gəlirləri azalıb, eyni zamanda qeyri-faiz xərcləri artıb.  Bankın qeyri-faiz gəlirləri 5 milyon 392 min manatdan 5 milyon 12 min manata düşüb, qeyri-faiz xərcləri isə 5 milyon 924min manatdan 6 milyon 461 min manata yüksəlib.

Bankın cəmi əməliyyat gəlirlərinin 366 min manat artması ilə bərabər əməliyyat xərcləri 172 min manat azalıb, nəticədə Bankın əməliyyat mənfəəti ötən ilin 9 ayı ilə müqayisədə 2020-ci ilin 9 ayında 538 min manat yüksək olub.

BANK BÖYÜYÜB, MÜŞTƏRİLƏRƏ VERİLƏN KREDİTLƏR ARTIB

2019-cu ilin sonu ilə müqayisədə Günay Bankın cəmi aktivləri 16 milyon 83 min manat və ya 7,5% artaraq 30 Sentyabr 2020-ci il tarixində 231 milyon 840 min manata çatıb. Bankın müştərilərə verdiyi kreditlər isə 20 milyon 632 min manat və ya 13% artaraq 179 milyon 548min manata yüksəlib.

Günay Bankın depozit portfeli cari ilin 9 ayında 3 milyon 605 min manat və ya 4,4% artaraq 85 milyon 174 min manata yüksəlib.

30 Sentyabr 2020-ci il tarixində Günay Bank 64  milyon 596 min manat məcmu kapitala malik olub.