“Moskva görüşündə bizə hər hansı təqvim verilmədi. Biz də çox israr etməmişdik. Çünki Moskva razılaşmasında bizi qane edən, bizim maraqlarımıza cavab verən maddələr bizi təmin etdi”.

Bunu Prezident İlham Əliyev oktyabrın 13-də Türkiyənin “Haber Türk” televiziya kanalına müsahibəsində deyib.

Dövlət başçısı qeyd edib ki, Moskva müzakirələrinin uzun çəkməsinin səbəbi məqbul olmayan maddələrin razılaşmaya salınması təklifi olub: “Onu da bildirməliyəm ki, Moskva müzakirələrinin uzun çəkməsinin səbəbi də o idi ki, bizə məqbul olmayan bəzi maddələr o razılaşmaya salınmalı idi. Bizim bundan xəbərimiz yox idi. Bizim Xarici İşlər nazirimiz Moskva gələndə və artıq müzakirə masasına oturanda hər iki nazirə təkliflər verildi. Təbii ki, mənimlə əlaqə saxlanıldı və müntəzəm olaraq biz əlaqədə idik. Mən bizim şərtlərimizi demişdim. O şərtlərdən kənarda hər hansı razılaşma mümkün deyildi. Ona görə biz vəziyyəti nəzərə alaraq, təqvimlə əlaqədar mövqeyimizi bir qədər yumşaltdıq. Ancaq bu o demək deyil ki, bu təqvim təqdim olunmayacaq. Bu olacaq. Artıq müzakirə müddətində olacaq. O açıqlamada göstərildi ki, müzakirələr bərpa edilir - baza prinsipləri, yəni ki, Madrid prinsipləri əsasında... Bu da Azərbaycan torpaqlarının qaytarılmasını təsbit edir. Eyni zamanda danışıqlar formatı dəyişməz olaraq qalır. Yəni, danışıqlar Ermənistan və Azərbaycan arasında aparılacaq. Hər hansı “Dağlıq Qarabağ Respublikası”nın nümayəndələrinin bu danışıqlarda iştirakı müzakirə mövzusu deyil. Bu bizi qane etdi. Bizim təxminimiz ondan ibarət idi ki, dərhal danışıqlar başlasın və təqvim bu danışıqlar çərçivəsində bizə təqdim edilsin. Bu təqvim bizi qane etməlidir. Bu, çox uzunmüddətli vaxt ola bilməz. Biz 30 il gözləmişik. Artıq Azərbaycan xalqının səbri tükənib. Əminəm ki, əgər danışıqlar bərpa edilərsə, bu təqvim bizə veriləcək. Ancaq Ermənistanın bu razılaşmanı pozması göstərir ki, onların niyyəti, sadəcə, olaraq vaxt qazanmaq, Azərbaycana öz hücumlarını davam etdirməkdir”.

“Ermənistan üzv olduğu Kollektiv Təhlükəsizlik Müqaviləsi Təşkilatını bu münaqişəyə cəlb etmək istəyir”

Prezident, “Ermənistanın xain hücumunun səbəbi odur ki, onlar bu münaqişənin coğrafiyasını genişləndirmək istəyirlər” bildirib.

Dövlət başçısı deyib ki, Ermənistan üzv olduğu Kollektiv Təhlükəsizlik Müqaviləsi Təşkilatını bu münaqişəyə cəlb etmək istəyir: “Məhz buna görə Ermənistan ərazisindən Azərbaycan torpaqlarını, mülki şəxsləri atəşə tuturlar və bizi cavab atəşinə təhrik edirlər. Fəqət, mən demişdim ki, bizim qisasımız döyüş meydanında olacaq. Biz heç vaxt mülki şəxslərə qarşı addım atmırıq və bizim bütün hədəflərimiz hərbi hədəflərdir. Əməliyyatın ilk günlərindən bütün hərbi hədəflər bir daha nəzərdən keçirildi və bizim dəqiq, sərrast atışlarımız bu hədəfləri məhv etdi. Ermənistan Ordusuna çox böyük zərər vuruldu, 200-dən çox tank, 2 ədəd S-300 məhv edildi, 33 tank hərbi qənimət kimi götürüldü. Bir çox başqa texnika da məhv edilib, qənimət kimi götürülüb. Ona görə bu, Ermənistanın növbəti terror aktıdır. Ancaq bu terror aktı Azərbaycan xalqının iradəsini qıra, sındıra bilməz. Biz daha böyük əzm və iradə ilə düşmənə qarşı vuruşacağıq, daha əzm və iradə ilə öz torpaqlarımızı azad edəcəyik və Azərbaycan bayrağını bütün işğal edilmiş torpaqlarda qaldıracağıq. Beynəlxalq təşkilatların və beynəlxalq aləmin buna reaksiyasına gəlincə, Türkiyə bir daha bu məsələ ilə bağlı bizi açıq və birmənalı dəstəklədi. Əziz qardaşım Rəcəb Tayyib Ərdoğanın açıqlamaları, yüksək səviyyəli dövlət rəsmilərinin açıqlamaları bir daha qardaşlıq mövqeyinin təzahürü idi. Pakistan və bu ölkənin Baş naziri böyük həmrəylik göstərərək çox müsbət açıqlama verib. Digər ölkələr də açıqlamalar verib. Ancaq deyə bilmərəm ki, bu, dünya miqyasında geniş vüsət alıb. Halbuki bu, hər kəs üçün gün kimi aydındır. Atəşkəs rejimi haqqında açıqlama verilir, ondan bir gün keçməmiş belə namərd hücum təşkil edilir. Bu, bir daha göstərir ki, atəşkəsi kim istəmir. Mən demişdim ki, bizim hədəflərimiz, məqsədimiz bütün işğal edilmiş torpaqlara Azərbaycan vətəndaşlarını qaytarmaqdır. Bildirmişdim ki, atəşkəs imkan verəcək ki, bu, artıq hərbi müstəvidən siyasi, diplomatik müstəviyə keçsin, diplomatik müstəvidə, masa arxasında danışıqlar bu məsələ çözülsün və Ermənistan hələ də işğal altında olan digər torpaqlardan çəkilsin, Azərbaycan vətəndaşları ora qayıtsın və sülh yaransın. Ancaq görünür ki, Ermənistanın planları tam başqa idi. Ermənistan hesab edirdi ki, bu atəşkəsdən istifadə edərək, bunu istismar edərək öz hərbi məğlubiyyətlərini bir qədər azalda, zaman qazana, yeni qüvvələr səfərbər edə bilərlər. Beləliklə, Azərbaycana qarşı hücumları davam etdirə bilərlər. Amma onlar yanıldılar. Mən demişdim ki, Ermənistan müsbət davranış göstərməsə, peşman olacaq və haqlı idim”.