Sənaye və İnnovasiyalar üzrə Bakı Dövlət Peşə Təhsil Mərkəzi ilə Technol arasında genişmiqyaslı əməkdaşlığa dair memorandum imzalanıb.

Əməkdaşlıq çərçivəsində müəyyən edilmiş sahələr üzrə ixtisaslı peşəkar kadrların yetişdirilməsi məqsədilə birgə tədris proqramları hazırlanacaq, təlimlər təşkil ediləcək, təhsilalanlara sahibkarlıq vərdişlərinin aşılanması, onların istehsalat təcrübə proqramlarında iştirak etməsi, müvafiq olaraq, bilik və bacaqırlarının qiymətləndirilməsi təmin ediləcəkdir.

Mərkəz həmçinin Technol əməkdaşlarının bilik və bacarıqlarının artırılmasında yaxından iştirak edəcək, eləcə də təhsil müəssisələrində müvafiq tədris proseslərinə cəlb etməklə yüksək ixtisaslı kadrların hazırlanmasında Şirkətə dəstək olacaqdır.

Ölkədə müasir tələblərə cavab verən rəqabətqabiliyyətli yeni nəsil işçi qüvvəsinin hazırlanması istiqamətində birgə fəaliyyət göstərəcək hər iki təşkilat kifayət qədər geniş elmi və istehsalat bazasına, təcrübəli ixtisaslı kadrlara malikdir.

Sənaye və İnnovasiyalar üzrə Bakı Dövlət Peşə Təhsil Mərkəzi Azərbaycan Republikası Nazirlər Kabinetinin 11 oktyabr 2016-cı il tarixli 405 N-li qərarı ilə Azərbaycan və Koreya hökumətləri arasındakı razılaşmaya uyğun olaraq, Koreya İqtisadi İnkişaf və Əməkdaşlıq Fondunun maliyyə dəstəyi ilə yaradılmışdır. Mərkəz – beynəlxalq təhsil standartlarına əsaslanan, qlobal sənaye ehtiyaclarına hazır rəqabətqabiliyyətli kadrlar hazırlığını həyata keçirən peşə təhsili müəssisəsidir.

Technol, Azərbaycanda və Qafqaz regionunda ilk mühərrik və sənaye yağları istehsalçısıdır. Şirkətin başlıca fəaliyyət məqsədi dünya üzrə tanınmış markaların göstəricilərinə cavab verən yağları istehsal edərək əlverişli qiymətə hər kəs üçün əlçatan etməkdir. İllik 50 min ton istehsal gücünə malik Şirkətdə istehsal prosesinin təşkili məqsədilə Alman istehsalı olan avadanlıqlar quraşdırılıb, istehsal prosesinin tam avtomatlaşdırılması həyata keçirilib. Şirkətin bütün mühərrik və sənaye yağları Infineum, Chevron, Afton kimi nüfuzlu təchizatçıların yüksək keyfiyyətli qatqılarından istifadə edilməklə Amerika Neft İnstitutunun (API), Avropa Avtomobil İstehsalçıları Assosiasiyasının (ACEA) standartlarına müvafiq qaydada istehsal edilir, Amerika Test və Materiallar Cəmiyyətinin (ASTM) tələbləri əsasında sınaqdan keçirilir. Şirkət müasir cihazları ilə təchiz edilən, yağların geniş səpkidə dəqiq analizi üçün beynəlxalq akkreditasiyadan keçmiş (ISO17025:2017) müasir laboratoriyaya malikdir. Technol mühərrik yağları Amerika Neft İnstitutunun müvafiq sertifikatına malik olmaqla yanaşı Mercedes-Benz və Cummins şirkətləri tərəfindən rəsmi qaydada təsdiq edilmişdir.