2019-cu ildə Azərbaycanın qiymətli kağızlar bazarında fəaliyyət göstərən 8 investisiya şirkətinin məcmu xalis mənfəəti 2,484 milyon manat təşkil edib.

Bu, 2018-ci illə müqayisədə 14,6% çoxdur.

İnvestisiya şirkətlərindən 2-si – “BTB Kapital” və “Plato Capital and Co.” ötən ili zərərlə başa vurub. Hesabat dövründə onların hər ikisinin zərəri azalıb. 2019-cu ildən mənfəətlə çıxmış qalan 6 maliyyə qurumundan isə 3-ü – “PAŞA Kapital”, “PSG Kapital” və “Unicapital” mənfəətini artırıb, qalanları isə azaldıb.

Ötən il investisiya şirkətlərinin vergiyəqədərki mənfəəti 3,236 milyon manat olub ki, bu da əvvəlki ilə nisbətən 17,3% çoxdur. Maliyyə qurumlarının ayrı-ayrılıqda vergiyəqədərki mənfəətlə bağlı vəziyyəti xalis mənfəətdə olduğu kimidir.  

2019-cu ildə investisiya şirkətlərinin məcmu mənfəət vergisi ödəmələri isə 752 min manat təşkil edib. Bu da illik müqayisədə 27,1% çoxdur. Maliyyə qurumlarından biri – “BTB Kapital” 2018-ci ildə olduğu kimi yenə də mənfəət vergisi ödəmələrinə qənaət edib, amma bu göstəricini azaldıb. Qalan 7 investisiya şirkəti isə müxtəlf məbləğlərdə mənfəət vergisi ödəyib. Onlarından 1-də - “Xalq Kapital” vergi ödənişini artırıb, qalanları isə azaldıb.

Məcmu aktivləri 2 dəfə azalıb

Bu il yanvarın 1-nə Azərbaycanın qiymətli kağızlar bazarında fəaliyyət göstərən 8 investisiya şirkətinin məcmu aktivləri 55,87 milyon manat təşkil edib. Bu, ötən il yanvarın 1-i ilə müqayisədə 48,5% və yaxud təxminən 2 dəfə azdır.

Hesabat dövründə investisiya şirkətlərindən 2-si – “Azfinance” və “PSG Kapital” aktivlərini azaldıb, qalanları isə artırıb.

Ötən ilin sonuna investisiya şirkətlərinin məcmu öhdəlikləri 42,556 milyon manat olub ki, bu da əvvəlki ilin sonuna nisbətən 56,9% azdır. Maliyyə qurumlarından 3-ü – “Azfinance”, “PSG Kapital” və “Xalq Kapital” öhdəliklərini azaldıb, qalanları isə artırıb.

Hesabat tarixinə investisiya şirkətlərinin məcmu balans kapitalı isə 13,314 milyon manat təşkil edib. Bu da illik müqayisədə 35,9% çoxdur. Maliyyə qurumlarının hamısı balans kapitalını artırıb.

Bu il yanvarın 1-nə investisiya şirkətlərinin məcmu nizamnamə kapitalı isə 8,505 milyon manat  olub. Bu isə ötən il yanvarın 1-nə nisbətən 23,3% çoxdur. Maliyyə qurumlarındaın 3-ü – “BTB Kapital”, “İnvest-AZ” və “Plato Capital and Co.” nizamnamə kapitalını artırıb, qalanları sabit saxlayıb.

Report