Bir neçə gündür Astara rayonunun çəltik sahələrində məhsul yığımına başlanılıb. Biçin kampaniyasına kifayət qədər kombayn və canlı qüvvə cəlb olunub.

Bu il yay mövsümündə havaların normadan artıq isti və quraq keçməsi məhsul istehsalçıları üçün bir sıra problemlər yaratsa da, çəltik sahələrinə düzgün aqrotexniki qulluğun göstərilməsi və suvarmanın növbəlilik əsasında təşkili məhsuldarlığa bir o qədər təsir etməyib.

Astara Rayon Dövlət Aqrar İnkişaf Mərkəzinin direktoru Etibar Abbasovunverdiyi məlumata görə, bu il rayonda 204,6 hektar sahədə çəltik əkilib. İndiyədək 87 hektar çəltik sahəsindən 366,3 ton məhsul yığılıb. Çəltik sahələrinin hər hektarından götürülən məhsuldarlıq 42,1 sentner təşkil edib.

Builki əkin mövsümündə çəltik əkini əsasən rayonun Artupa, Səncərədi, Suparibağ, Kakalos, Ərçivan, Şiyəkəran, Pensər kəndlərindəki təsərrüfatları əhatə edib. Çəltikçiliklə məşğul olan fermerlər və məhsul istehsalçıları daha çox “Haşımi”, “Sədri”, “Apula, “Şiruzi”, “Xəzər”, “Okean” və “Həsəni” kimi toxum növlərinə üstünlük veriblər.

Astarada çəltikçiliyin inkişafı üçün geniş perspektivlər var. Ərazidən Astara və Pensər çayının keçməsi, Lovayın su anbarının yenidən qurulması sahələrin suvarılmasında mühüm rol oynayır.

Astara hələ qədimdən ənənəvi kənd təsərrüfatı sahələrindən olan çəltikçiliyi ilə məşhurdur. Ətirli Astara düyüsü yüzilliklər ərzində yerli əhalinin ən qiymətli ərzaq məhsulu olub. “Sədri”, “Ənbərbu”, “Haşımi” və digər çəltik növlərindən hasil olan düyü öz ətri, dadı və bərəkəti ilə seçilib.

Çəltikçilik çox gəlirli sahədir. Hər hektardan 50-60 sentner məhsul götürməklə düyü maya dəyərindən 10-15 dəfə baha satılır. Bazarlarda yerli düyünün qiyməti 4-5 manat arasındadır. Ekoloji cəhətdən təmiz və keyfiyyətli olduğu üçün bazarda yerli düyüyə tələbat böyükdür.

Ölkə bazarlarında Astara düyüsünə tələbat yüksək olduğundan məhsul istehsalçıları çəltik əkininə daha çox üstünlük verirlər. Sevindirici haldır ki, artıq xarici ölkələrdə fəaliyyət göstərən şirkətlərdən də Astara düyüsünün sifarişçilər var. Onlar sərfəli şərtlərlə iş adamlarına indidən müqavilələr təklif edirlər.

Rayonda çəltik yığımı kampaniyası sentyabrın sonlarınadək davam edəcək.

Azərtac