Azərbaycanın fermer təsərrüfatlarında müasir suvarma sistemlərindən istifadə genişlənir. Artıq minlərlə təsərrüfatda, xüsusilə intensiv bağlarda damlama suvarma sistemlərindən istifadə edilir.

Şamaxının İkinci Çaylı kəndindən olan fermer Habil Əzimov 30 hektar üzüm bağında damlama suvarma sistemi quraşdırıb. Fermer müasir suvarma sistemlərinin məhsuldarlığa ciddi təsir göstərdiyini deyir: “2014-cü ildə saldığımız 30 hektar üzüm bağının 25 hektarında damlama suvarma sistemi quraşdırılıb. Bu sistem məhsuldarlığa çox ciddi təsir göstərir, müasir suvarma sistemi ilə təchiz olunmuş bağlardan ənənəvi bağlarla müqayisədə iki-üç dəfə çox məhsul götürürük. Damla suvarma sistemlərinin bir neçə üstün cəhəti var. Bu sistemin tətbiqi zamanı torpaq şoranlaşmır, suya qənaət olunur, alaq problemi azalır, mineralların torpağa verilməsi asanlaşır”.

Kənd Təsərrüfatı Nazirliyi müasir suvarma sistemlərinin üstünlüklərini nəzərə alaraq fermerlərə öz təsərrüfatlarında bu cür yeniliklərdən istifadə etməyi məsləhət görür. Nazirliyin İctimaiyyətlə əlaqələr və informasiya təminatı şöbəsinin müdiri Vüqar Hüseynov dövlətin təsərrüfatlarda müasir suvarma sistemlərinin quraşdırılmasına dəstək verdiyini deyir: “Ötən ildən etibarən müasir suvarma sistemləri dövlət güzəşti tətbiq olunan kənd təsərrüfatı avadanlığı siyahısına daxil edilib. Bu o deməkdir ki, fermerlərimiz 20 faiz ilkin ödəniş etməklə suvarma sistemlərini alaraq öz sahələrində quraşdıra bilərlər. Satın alınan suvarma sisteminin dəyərinin 40 faizini dövlət ödəyir, qalan 40 faiz isə banklar tərəfindən 5 il müddətinə kreditləşdirilir. Kreditin əsas hissəsini fermer, faizlərini isə dövlət ödəyir. Fermerlərimizi dövlətin yaratdığı imkanlardan yararlanmağa, təsərrüfatlarda dövlət dəstəyi ilə müasir suvarma sistemləri quraşdırmağa çağırırıq”.

Qeyd edək ki, 2019-cu ildən başlayaraq salınmış intensiv bağların hər hektarına görə dövlət tərəfindən 400-800 manat subsidiya verilir. İntensiv bağın əsas fərqləndirici xüsusiyyətlərindən biri onun müasir suvarma sistemi ilə təchiz olunmasıdır. Damlama suvarma üsulunun tətbiqi nəticəsində meyvənin məhsuldarlığı növündən asılı olaraq adi bağa nisbətən 4-6 dəfə arta bilir.

Azərtac