“S&P Global Ratings” beynəlxalq reytinq agentliyi Azərbaycanın sığorta sektorunun risklərini yüksək kimi qiymətləndirir. Bu barədə agentliyin hesabatında deyilir.

“Bizim risk qiymətləndirməmiz Azərbaycanda iqtisadiyyat, siyasət, maliyyə sistemi, ödəniş mədəniyyəti və qanunun aliliyi prinsipinin məruz qaldığı risklər barədə rəyi əks etdirir. Cari makroiqtisadi tendensiyaları, sığorta xidmətlərinin nüfuzetmənin aşağı səviyyəsi və 2020-ci ildə sığorta haqlarının artım perspektivlərinin orta olduğunu nəzərə alaraq, Azərbaycanın sığorta şirkətləri üçün əməliyyat fəaliyyət şərtlərini əlverişsiz hesab edirik”, - hesabatda qeyd edilir.  

Agentlik qeyd edir ki, Azərbaycanın qeyri-həyat sığortası sektorunun qiymətləndirilməsi Rusiya, Türkiyə və Portuqaliya üçün analoji qiymətləndirmələrə uyğundur. Həmçinin, qeyd olunan ölkələrdə qeyri-həyat sığortası sektoru müxtəlif inkişaf səviyyələrindədir.

“S&P” sahənin dinamikası və bu seqmentdə fəaliyyət göstərən şirkətlərin gəlirlilik göstəricilərinə müsbət təsir edən sığorta məhsullarının xarakteristikalarını nəzərə alaraq, sektorun gəlirliliyinin yaxşı göstəricilərini vurğulayır.

“Cari makroiqtisadi şərtlər və işgüzar fəallığın və ÜDM-in artım templərinin azaldığını nəzərə alsaq, hesab edirik ki, Azərbaycanda sığorta xərcləri adambaşı 20-25 dollar səviyyəsində qalacaq, sığorta xidmətlərinin nüfuzetmə səviyyəsi isə aşağı olaraq qalacaq və beş il ərzində 0,5% təşkil edən orta göstəriciyə yaxınlaşacaq”, - hesabatda qeyd olunur.

Agentliyin analitiklərinin rəyinə görə, gələcəkdə artım perspektivləri mühüm dərəcədə qeyri-həyat sığortası ilə məşğul olan şirkətlərin tənzimləyici orqanın proqnozlaşdırılan yeni təşəbbüslərinin reallaşdırılması və ortamüddətli perspektivdə yeni sığorta məhsullarını tətbiq etmək bacarığından asılı olacaq.

Hazırda Azərbayanda 21 sığorta şirkəti fəaliyyət lisenziyasına malikdir.

“İnterfaks-Azərbaycan”