"Yerli tingçilik təsərrüfatının yaradılması bizim üçün əsas məqsədlərdən biridir. Bununla bağlı ölkə başçısının müvafiq fərmanı və tapşırıqları var. Lakin bu gün bizim bağlarda qocalma və seyrəlmə prosesi gedir".

Bunu "Qeyri-neft ixracatçılarının respublika müşavirəsi"ndə çıxışı zamanı "Tovuz-Baltiya" MMC-nin baş direktoru Naiq Məmmədhəsənov bildirib.

Onun sözlərinə görə, bu gün şərabçılığın inkişafı baxımından texniki üzüm sortlarının yetişdirilməsi olduqca vacibdir.

"Ən vacib məsələlərdən biri də köməkçi materiallara olan tələbatın daxili bazar hesabına ödənilməsidir. Cənab prezidentin də qeyd etdiyi kimi, valyuta axınının qarşısını almaq üçün zavod və fabriklərimizin imkanları artırılmalıdır. Azərbaycanda "İnterGlass" adlı zavod var və həmin zavod Qafqazın şüşəyə olan tələbatını tam ödəyə bilər. Oradakı avadanlıqların hamısı İtaliyadan gətirilib və dövlət bu zavoda iri investisiya qoyub. Biz bu gün bəzi məhsulları Fransadan idxal edirik. Niyə bizim valyutamız xaricə axmalıdır? Biz niyə logistikaya əlavə vəsait verməliyik? Biz bu gün qiymətlə bağlı rəqabətə tab gətirmirik. Bu gün biz məcburiyyətdən Moldova, Gürcüstan kimi kiçik ölkələrdən məhsul alırıq. Bizim yaxşı şərabçılıq məhsullarımız var. Lakin köməkçi materialların çatışmazlığı, onların idxalı ucbatından xaricə məhsul ixrac edə bilmirik. Buna görə, mən "İnterGlass" zavodunun tam gücü ilə işləməsi üçün xahiş edirəm ki, aidiyyəti qurumlar bir tədbir görsün. Bu problem həllini taparsa, biz idxaldan azad olarıq", - deyə o bildirib.

Şirkət rəhbəri bankların əməllərindən də gileylənib: "Bu gün biz overdraftlarımızdan, akkreditivlərimizdən istifadə edə bilmirik. Bu gün logistika, köməkçi materiallar necə vacibdirsə, hər şeyin mərkəzində dayanan maliyyə-bank sistemi də bir o qədər vacibdir. Məsələn, mənim bu gün bank hesabımda 50 min avro oturub, mənə 20 min manat verin ki, elektrik enerjisinin pulunu köçürüm. Mənə o vəsaiti vermirlər. Deyirlər ki, mənim adım hansısa bankın "qara siyahısı"ndadır. Halbuki mən həmin bankla məhkəmə çəkişməsini udmuşam, əlimdə qətnamə də var. Amma adımı "qara siyahı"dan çıxaran yoxdur! Belə çıxır ki, bu cür məsələləri araşdıran yoxdur".

© APA