Qızılın qiyməti daha da yüksələ bilər

Avropa Birliyi zirvə toplantısı öncəsi avronun qiymətində son günlərin korreksiyası davam etməkdədir və qərarlar yanaşı, biznes aktivliyi göstəriciləri də diqqət mərkəzindədir.

Beynəlxalq maliyyə bazarlarında bu gün Avropa Birliyi zirvə toplantısının yekun nəticəsi, Avrozona və İngiltərənin xidmət və sənaye sektorlarına dair biznes aktivliyi indekslərinin açıqlanması diqqət mərkəzində olacaqdır. Bununla yanaşı, enerji birjalarında son günlər neftin qiymətlərində müşahidə edilən satış dalğası da bahalaşma ilə əvəz edilib. Bunun əsas səbəbi isə Amerika hökümətinin iqtisadiyyata maliyyə yardımının ayrılması xəbərləridir.

Beləliklə, qlobal iqtisadiyyatda yenidən müsbət tendensiyaların müşahidə edilə biləcəyi ehtimalları, valyuta birjalarında da öz əksini tapıb. Dollar və Funtun qiymətləri bahalaşıb. Avronun qiymətləri isə bu gün AB zirvə toplantısında başlayacaq maliyyə yardımı müzakirələrinin nəticələrindən asılı olaraq dalğalanacaqdır. Toplantıda Korona bondlarının müzakirələri çətinləşdirə biləcəyi də gözləniləndir.

USD/JPY məzənnəsi də yuxarıda toxunulan səbəb və Yaponiya iqtisadiyyatına dair açıqlanan mənfi fundamental göstəricilər fonunda bahalaşmaqdadır və 108 yen müqavimət səviyyəsinin inamlı qırılması, bahalaşmanın güclənməsinə səbəb ola bilər.

Əlvan metallar bazarlarında isə qızılın qiyməti yeni maliyyə yardımlarının inflyasiyanın artmasına təsir edə biləcəyi ehtimalları fonunda bahalaşmaqda davam edir. Hazırda 1700$-ın üzərində ticarət edilən bir unsiya üzrə qiymət, 1720$-ın üzərində möhkəmlənməklə, 1754$-a kimi dəyər qazana bilər.

Məlumat Azərbaycanın İnvestAZ İnvestisiya şirkətinin analitikləri tərəfindən hazırlanıb.

23.04.2020 11:27

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az