SOCAR-ın investisiyalarını azaldacağı proqnozlaşdırılır

SOCAR-ın investisiyalarını azaldacağı proqnozlaşdırılır

2019-2022-ci illərdə SOCAR-ın kapital qoyuluşları (investisiyalar) 12 milyard manat (cari məzənnə ilə 7 milyard dollar) məbləğində qiymətləndirilir.

Bu barədə “Fitch” agentliyinin məlumatında deyilir.

Daha əvvəl SOCAR-ın 2019-2022-ci illər üçün kapital qoyuluşları 14 milyard manat (cari məzənnə ilə 8,2 milyard dollar) məbləğində qiymətləndirilirdi. Kapital qoyuluşlarının həcmi ilə bağlı proqnozun dəyişməsi “Fitch” tərəfindən neftin orta qiymətinin azaldılması ilə şərtlənib.

"2019-2022-ci illərdə şirkətin kapital qoyuluşları bu dövrdə manatın sabit məzənnəsi 1 dollar = 1.70 manat olmaqla 12 milyard manat təşkil edəcək”, - deyə məlumatda bildirilir.

“Fitch”in proqnozlarına görə, 2020-ci ildə bir barrel neftin orta qiyməti 35 dollar (yanvar proqnozu 62,5 dollar), 2021-ci ildə 45 dollar (yanvarda 60 dollar idi), 2022-ci ildə 53 dollar (yanvarda 57,5 dollar idi) olacaq.

Agentliyin analitikləri qeyd edirlər ki, 31 dekabr 2019-cu il tarixinə SOCAR-ın likvidliyi 4,6 milyard manat məbləğində qısamüddətli borca və uzunmüddətli borcların cari hissəsinə qarşı təxminən 7,8 milyard manat təşkil edib.

“Likvidlik 6,8 milyard manat məbləğində pul vəsaitləri və onların ekvivalentindən, eləcə də Heydər Əliyev adına Neft Emalı Zavodunun modernləşdirilməsi üçün 1 milyard manat məbləğində istifadə olunmamış kredit xətlərindən ibarət olub. Qısamüddətli borc öhdəliklərinin əsas hissəsi ABŞ dollarında formalaşıb və SOCAR-ın ticarət bölməsi olan “SOCAR-Trading”, Petkim neft-kimya kompleksi və əsas şirkətlə əlaqəlidir. 2020-2021-ci illərdə mənfi sərbəst pul axını üzrə proqnozla əlaqədar likvidlik müəyyən təzyiq altında ola bilər. Bununla belə, biz dövlətin kapital qoyuluşları hesabına istənilən likvidlik fərqinin yerini dolduracağını gözləyirik”, - deyə agentliyin ekspertləri qeyd edirlər.

“Fitch”in qiymətləndirmələrinə görə, 2019-2022-ci illərdə SOCAR-ın birgə müəssisələrə investisiya qoyuluşları 800 milyon manat təşkil edəcək.

©️ İnterfaks-Azərbaycan

20.04.2020 10:06

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az