Turkiyənin maliyyə bazarları ilə əmlak şirkətlərinin birgə əməkdaşlığı nəticəsində ölkədə yeni maliyyə alətinin tətbiqinə başlanılıb.

Bu barədə Azərbaycanın “Kapital Menecment" investisiya şirkətinin analitiki Cəfər İbrahimli məlumat verib.

Onun sözlərinə görə, Türkiyənin Baş Nazirliyinə bağlı olan “TOKİ” dövlət inşaat şirkəti daşınmaz əmlak sertifikatları emissiya edərək onları kütləvi təklif üsulu ilə İstanbul birjasında (“Borsa İstanbul” – “Bakı Fond Borjası” QSC-nin 4,76%-lik səhmdarıdır) yerləşdirib. Şirkət bundan sonra inşa edəcəyi binalarının xərcinin 27%-ni bu sertifikatlar vasitəsilə maliyyələşdirmək niyyətindədir.

C.İbrahimli bildirib ki, bu, investorlar üçün bir sıra imkanlar yaradır. Belə ki, Türkiyədə daşınmaz əmlaka investisiya etmək istəyən istənilən yerli və xarici investorlar, o cümlədən Azərbaycan vətəndaşları hər birinin nominal dəyəri 42,5 türk lirəsi (19,41 manat) olan bu qiymətli kağızları alaraq İstanbulun daşınmaz əmlak bazarına pay sahibi ola bilər. Hazırda 1 kv. metr mənzil sahəsinin qiyməti cari məzənnə ilə 1 150 ABŞ dolları (təxminən 4 250 lirə) edir ki, bu da ona sahib olmaq üçün 100 sertifikatın alınmasını zəruri edir. “TOKİ” inşa etdiyi binaların 27%-ni məhz bui yolla satır.

İnvestor təxminən 3 ildən sonra malik olduğu sertifikat qədər daşınmaz əmlaka sahib ola və yaxud istədiyi vaxt birjada payını sataraq ortaqlıqdan geri çəkilə bilər. Burada əsas diqqət yetirilməli olan məsələ isə odur ki, sertifikatların bu gün müəyyən edilmiş ilkin satış qiyməti bina hazır olana qədər artmaqda davam edəcək. Çünki, binanın təhvil verilmə vaxtı yaxınlaşdıqca mənzillər bahalaşır. Yəni, sertifikat sahibləri istənilən halda qiymət fərqindən qazanacaqlar.

Bu imkandan istifadə etmək istəyən azərbaycanlı investorlar İstanbul birjasına çıxış imkanı olan “Kapital Menecment” investisiya şirkəti ilə müqavilə bağlaya bilərlər. 

©