Bu reystrdən otellər, turoperator və turagentlər, onların məhsulları, bəldçilər, hətta restoranlar və onların menyuları haqqında məlumatlar əldə etmək mümkün olacaq.

Azərbaycan Respublikasının Nazirlər Kabineti “Turizm Reyestrinin aparılma Qaydası”nı təsdiq edib.

“Marja”nın məlumatına görə, Baş Nazir Əli Əsədovun imzaladığı qaydalarda bildirilir ki, reyestr – turizm ehtiyatları, o cümlədən turizm nümayiş obyektləri, turizm məhsulları və turizm sənayesinin subyektləri haqqında məlumat bazasını, turizm sahəsində statistik məlumatları və onların monitorinqlərinin nəticələrini özündə əks etdirən elektron dövlət informasiya ehtiyatıdır.

Qısası reyestr turizm sənayesinə dair məlumatların vahid mənbədə toplanılması, emalı, axtarışı, təhlili və ötürülməsi, turizm məhsullarının və xidmətlərinin keyfiyyətinin yüksəldilməsi məqsədilə aparılacaqdır.

Hüquqi və ya fiziki şəxslər reyestrə daxil olaraq məlumatlarından istifadə edə biləcəklər.

Reyestrin fəaliyyətinin təşkilini, idarə olunmasını və inkişafını Reyestrin operatoru olan Dövlət Turizm Agentliyi təmin edəcəkdir.

Reyestr turizm sənayesinin subyektləri barədə məlumatların toplanılmasını, saxlanılmasını, istifadəsini və daxil edilən məlumatların dəqiqliyini, tamlığını və etibarlılığını, həmin məlumatlar əsasında turizm sənayesinin subyektlərinin reytinq cədvəllərinin formalaşdırılmasını, istifadəçilər tərəfindən Azərbaycan Respublikasının normativ hüquqi aktlarına əsasən açıq hesab edilən məlumatların əldə edilməsini, turizm sahəsində elektron xidmətlərin göstərilməsini, məlumatlandırma və maarifləndirmə işlərinin həyata keçirilməsini təmin etməlidir.

Reyestrdə aşağıdakı məlumatlar yer alacaqdır?

1. turizm ehtiyatları;

2. turizm məhsulları;

3. turizm sənayesinin subyektləri: yerləşmə vasitələri;  turoperator və turagentlər;  turizm bələdçiləri;  aqroturizm obyektləri; məsuliyyətli ekoturizm obyektləri;  çimərlik operatorları;  özündə bir neçə fəaliyyət sahəsini birləşdirən qarışıq tipli turizm obyektləri;  işgüzar turizm subyektləri;  ictimai iaşə obyektləri; turizm nəqliyyat fəaliyyəti ilə məşğul olan şəxslər;  əyləncə obyektləri;  turizm təhsili və təlimi xidmətləri göstərən hüquqi şəxslər; “Azərbaycan Turizm Bürosu” publik hüquqi şəxs, onun filial və nümayəndəlikləri; turizm sənaye assosiasiyaları; sənətkarlar;

4. turizm təqvimləri;

5. turizm sahəsində statistik məlumatlar;

6. turizm sahəsində aparılmış monitorinqlərin nəticələri

VÖEN-i olan şəxslər  “ turizm sənayesinin subyektləri tərəfindən turizm tədbirlərində (sərgi, festival, konfrans, seminar və s.) iştirak etmək üçün müraciətlərin edilməsi”, “turizm üzrə investisiya layihələrinin təqdim edilməsi”, “turizm sahəsində statistik məlumatların, Agentlik tərəfindən hazırlanmış analitik hesabat və araşdırma nəticələrinin əldə edilməsi”  xidmətlərdən istifadə edə biləcəklər.

Vətəndaşlar isə   Agentlik tərəfindən verilən kod-parol vasitəsilə reyestrdən istifadə edə biləcəklər.

Reyestrdən istifadə və Reyestrdən məlumatların əldə edilməsi ödəniş olacaqdır.