InvestAZ İnvestisiya şirkətinin analitikləri bu həftə üzrə dünya maliyyə bazarlarında son vəziyyət və qısa müddət ərzində gözlənilənlərlə bağlı məlumat verib.

EUR

Beynəlxalq valyuta birjalarında dolların aparıcı valyutalara nisbətən qiymətlərində bahalaşma müşahidə edilsə də Amerika Mərkəzi Bankının (FED) uzun müddətli planları fonunda hökm sürən qeyri-müəyyənlik təzyiqləri yenidən artıra bilər. Qısa müddətli qiymətli kağızlar bazarında tələbin artmasının qarşısını almaq məqsədilə FED-in yenidən bazar əməliyyatlarını bərpa etməsi uzun müddətli perspektivdə suallar yaradır.

Beləliklə, EUR/USD məzənnəsində yenidən 1.12$-a kimi bahalaşmanın şahidi ola bilərik.

Bununla yanaşı, Amerika, Almaniya, İngiltərə, İsverçrə və s ölkələrdə Yeni İl bayramı ilə əlaqədar cari həftə ərzində ticarət aktivliyinin aşağı düşməsi gözlənilir.

GBP

GBP/USD məzənnəsində də ucuzlaşma dinamikasında zəifləmə müşahidə edilir və bu, artım dalğasının yarana biləcəyinə işarədir.

Qeyd etmək lazımdır ki, yanvarın 31-də Breksitin baş tutacağı dəqiqləşəndən sonra gələcək bir il ərzində əsas diqqət mərkəzində olacaq hadisə AB ilə ticarət sazişinin razılaşdırılmasıdır.

TRY

USD/TRY məzənnəsində bahalaşma davam edir və təhlillər qiymətin 5.99TL-yə kimi inkişaf edə biləcəyinə işarədir.

TCMB-nin növbəti faiz azaldılması ehtimalları Türkiyənin xarici hesablaşmalarda müsbət saldosunun daha da azala biləcəyindən xəbər verdiyi üçün bu, lirənin də ucuzlaşmasına səbəb olur.

OIL

Enerji birjalarında Avropanın Brent markalı neftinin bir barel qiyməti 67$-a kimi bahalaşdıqdan sonra korreksiyaya başlayıb və bu, 65$-a kimi dərinləşə bilər. 

Cümə günü saat 19:30-da açıqlanacaq Amerikanın neft və benzin ehtiyatları ilə bağlı önəmli fundamental məlumatların da qiymətlərə güclü təsir edəcəyi gözlənilir.

GOLD

Əlvan metallar bazarlarında qızılın qiymətində da bahalaşma müşahidə edilir. Bir unsiya üzrə qiymət 1481$-ın (47.6 $/qram) üzərində möhkəmlənərsə, 1491$-a (47.9 $/qram) kimi dəyər qazana bilər.

İnvestisiya ilə bağlı suallarınızı *1234 telefon nömrəsi və www.investaz.az veb saytı vasitəsilə bizə ünvanlaya bilərsiniz.

“İnvest-AZ İnvestisiya Şirkəti” QSC-nin Analitika Departamenti

“İnvest-AZ İnvestisiya Şirkəti” Qapalı Səhmdar Cəmiyyətinin fəaliyyəti Azərbaycan Respublikası Maliyyə Bazarlarına Nəzarət Palatası tərəfindən tənzimlənir. Şirkət, 09.01.2016-cı il tarixli 087986 saylı lisenziyası əsasında broker, anderraytinq (diler), marja ticarəti (forex), fərdi investorların portfelinin idarə edilməsi, market meykerlik və sair investisiya xidmətləri üzrə fəaliyyət göstərməkdədir.

Risk bildirişi.

Yuxarıda göstərilən məlumatlar tamamilə tövsiyə xarakterlidir. Bu fəaliyyət üzrə həyata keçirilən əməliyyatlar yüksək risk qrupuna daxildir və “İnvest-AZ İnvestisiya Şirkəti” QSC yuxarıda göstərilən məlumatlar əsas götürülməklə, həyata keçirilən investisiya əməliyyatları üzrə heç bir öhdəlik daşımır.