“Azərxalça” Açıq Səhmdar Cəmiyyətinin regional yun və boyaq bitkilərinin tədarükü məntəqələrindən biri də Bərdə rayonunda yaradılıb. Bu ilin may ayından fəaliyyətə başlayan tədarük məntəqəsi Ağdam, Füzuli, Beyləqan, Ağcabədi, Tərtər, Goranboy, Daşkəsən, Gədəbəy, Göygöl, Şəmkir, Tovuz, Qazax, Ağstafa rayonlarına və Yevlax şəhərinə xidmət göstərir. Tədarük məntəqəsində yun qəbulu prosesi davam etdirilir.

“Azərxalça” ASC-nin yaydığı məlumatda bildirilir ki, Cəmiyyətin İdarə Heyətinin sədri Vidadi Muradov Bərdədəki regional məntəqədə olub, xarici mütəxəssislərin iştirakı ilə yun tədarükünün gedişi ilə maraqlanıb.

Baxış zamanı qeyd olunub ki, Sumqayıt Kimya Sənaye Parkında inşa olunan Yunəyrici-Boyaq Fabrikinin fəaliyyətinin təmin olunması məqsədilə Türkiyədən mütəxəssislər dəvət edilib. Həmin mütəxəssislər həm fabrik, həm də tədarük məntəqələri üçün yerli mütəxəssislər hazırlayaraq bu sahənin kadr potensialını formalaşdıracaqlar. Onlar bu sahə üzrə ixtisaslaşmış təcrübəli mütəxəssislərdir. Məqsəd beynəlxalq təcrübəni Azərbaycanda tətbiq etməkdir.

Bildirilib ki, məntəqədə yalnız ildə bir dəfə, diri qoyunların bel hissəsindən qırxılan, uzunluğu ən azı 8 santimetr olan yunun qəbulu həyata keçirilir. İndiyədək 100 tona yaxın yun qəbul olunub. Onun 45 tonu çeşidlənərək Yunəyrici-Boyaq Fabrikinə təhvil verilməsi üçün hazırlanıb.

Məlumat verilib ki, regional məntəqəyə gətirilən məhsul rənginə və ölçüsünə görə çeşidlənir. Yun çeşidləndikdən sonra Sumqayıtdakı fabrikə göndəriləcək məhsulun üzərinə xüsusi yarlıqlar vurulur. Həmin yarlıqda yunun rəngi, qəbul tarixi, hansı rayondan alındığı, çəkisi, növü (qaba və incə), nəmliyi barədə məlumatlar öz əksini tapır.

Türkiyədən dəvət olunmuş mütəxəssislər Əli Koroğlu və İsmayıl Çoruh regional məntəqəyə qəbul edilmiş yunun keyfiyyəti, işçilərin peşəkarlıq səviyyələrinin artırılması istiqamətində görülən işlər barədə məlumat veriblər.
İdarə Heyətinin sədri yun tədarükü zamanı müəyyənləşdirilmiş standartlara ciddi əməl olunması, məntəqəyə keyfiyyətli yunun qəbul edilməsi barədə tapşırıqlar verib.

Qeyd edək ki, məntəqədə işçilər üçün lazımi şərait yaradılıb, burada inzibati otaqlar və yeməkxana istifadəyə verilib. Məntəqənin işçiləri xüsusi geyim forması ilə təmin olunublar.

Tədarük məntəqəsinə hər il  300 ton yun qəbul ediləcək.