Azərbaycan iqtisadiyyatı Qazaxıstanla müqayisədə neft qiymətlərinin düşməsinə daha həssasdır.

Bu barədə "Moody's" beynəlxalq reytinq agentliyinin 2 ölkənin iqtisadi həssaslığı, institutları və borc yükünün müqayisəsi ilə bağlı hazırladığı hesabatda bildirilib. 

Sənəddə qeyd olunub ki, Azərbaycan və Qazaxıstan 2014-cü ildə başlayan neft qiymətlərinin düşməsindən eyni dərəcədə mənfi təsirə məruz qalıb. Hər iki ölkədə ikirəqəmli inflyasiya, valyuta ehtiyatlarının azalması, bank sektorunun zəifləməsi baş verib.

Buna baxmayaraq, Qazaxıstan Azərbaycanla müqayisədə daha geniş iqtisadi diversifikasiya və daha aşağı borc yükünə sahib ölkə kimi qiymətləndirilir.

"Moody's" hər iki ölkənin iqtisadi artımının və gəlirlərinin karbohidrjgen ixracına birbaşa bağlı olduğunu vurğulayır. Amma, Azərbaycan iqtisadiyyatının Qazaxıstanla müqayisədə 3,5 dəfə kiçik, ehtiyatlarının isə 2 dəfə az olması səbəbindən aşağı neft qiymətlərinə də daha həssas olduğu bildirilir. Həmçinin, Qazaxıstanın Azərbaycana nisbətən biznes mühitinin inkişafı və struktur islahatlarının aparılmasında daha çox addım atdığı qeyd olunur. Agentlik müqayisə üçün bildirir ki, əgər Azərbaycanın 2015-ci ildə neft-qaz ixracı məcmu ixracın 89%-ni, nominal ÜDM-in 26%-ni, gəlirlərin 60-70%-in təşkil etmişdirsə, Qazaxıstanda bu göstəricilər müvafiq olaraq 76%, 18% və 42% olub.

"Moody's" Qazaxıstanda mövcud qurumların daha effektiv siyasət həyata keçirdiyini, məlumat bazasını yayımladığını, bununla da şəffaflığı artırdıqlarını xatırladıb.

Həmçinin, Azərbaycanın daha çox borca, lakin kifayət qədər fiskal rahatlığa sahib olduğu bildirilir. Azərbaycanın borcunun ÜDM-də xüsusi çəkisinin son 2 ildə bank sektoruna birbaşa dəstək verməsi səbəbindən 30%-ə yüksəldiyi qeyd olunub. Qazaxıstanda isə bu göstərici 10 faiz bəndindən az artıb.

Hər iki ölkədə bank sektorunda problemlər var və onlara "Moody's" tərəfindən verilən proqnoz mənfi kimi qiymətləndirilib. Problemli kreditlərin həcmi 2016-cı ilin yekununda Azərbaycanda 25%, Qazaxıstanda isə 37% təşkil edib.

"Moody's" Qazaxıstan iqtisadiyyatının 2017-2018-cu illərdə müvafiq olaraq 2,5% və 2,6%, Azərbaycanda isə 1,1% və 1,9% artacağını proqnozlaşdırır.

©Report