“Azərbaycan Beynəlxalq Bankı” ASC-nin törəmə investisiya şirkətinin yaradılması nəzərdə tutulur.

"Marja" xəbər verir ki, 11 oktyabr 2019-cu il tarixində “Azərbaycan Beynəlxalq Bankı” ASC-nin səhmdarlarının növbəti Ümumi Yığıncağının gündəliyinə daxil olan məsələlərdən biri də törəmə investisiya şirkətinin yaradılmasıdır.

HƏMÇİNİN OXU: Beynəlxalq Bank dividend ödəyib, səhmlərini geri alacaq - YIĞINCAQ ÇAĞIRDI

Qeyd edək ki, "Azərbaycan Beynəlxalq Bankı" 8 milyard 487 milyon 726 min manat aktivləri ilə Azərbaycanın ən böyük bankıdır.

Məlumat üçün bildirək ki, hazırda Maliyyə Bazarlarına Nəzarət Palatasının lisenziyası ilə 10 investisiya şirkəti fəaliyyət göstərir. 

İnvestisiya şirkəti investisiya şirkəti fəaliyyəti üçün lisenziyaya malik olan, fəaliyyətinin müstəsna predmeti əsas və yardımçı investisiya xidmətlərinin göstərilməsi olan səhmdar cəmiyyəti formasında yaradılan hüquqi şəxsdir.

Əsas və yardımçı investisiya xidmətləri “İnvestisiya şirkətləri tərəfindən investisiya xidmətlərinin (əməliyyatlarının) həyata keçirilməsi haqqında Qaydalar”  “Qiymətli kağızlar bazarında marja ticarətinə dair Qaydalar” ilə tənzimlənir. İnvestisiya şirkətləri tərəfindən hesabatlarının tərtib və təqdim olunması “İnvestisiya şirkətinin hesabatlarının tərtib və təqdim olunması Qaydaları”na uyğun olaraq həyata keçirilir.

Əsas investisiya xidmətləri (əməliyyatları) aşağıdakılardır:

- Qiymətli kağızlar və ya törəmə maliyyə alətləri ilə aparılan əməliyyatlarla bağlı müştəri sifarişlərinin qəbul və icra edilməsi;

- Fərdi investorların portfelinin idarə edilməsi;

- İnvestisiya məsləhətlərinin verilməsi;

- Qiymətli kağızların öhdəlik götürmədən yerləşdirilməsi və anderraytinqi;

- Qiymətli kağızların öhdəlik götürməklə yerləşdirilməsi və anderraytinqi;

- Mərkəzi depozitarın və fond birjasının üzvü qismində öz hesabına qiymətli kağızlar və ya törəmə maliyyə alətləri ilə əməliyyatlar aparılması;

- Marja ticarəti.

Yardımçı investisiya xidmətləri (əməliyyatları):

- Müştərisinin qiymətli kağızlar hesablarının idarə edilməsi, o cümlədən qiymətli kağızların və ya törəmə maliyyə alətlərinin öhdəliklərlə yüklənməsi ilə bağlı əməliyyatların həyata keçirilməsi;

- İnvestorlara qiymətli kağızlar və ya törəmə maliyyə alətləri ilə həyata keçirdiyi əqdlərin bağlanması üçün kredit və ya digər formada borc verilməsi;

- Qiymətli kağızlar və ya törəmə maliyyə alətləri ilə bağlı investisiya tədqiqatı və maliyyə təhlilinin aparılması;

- Təmin edilmiş istiqrazlar üzrə təminatın sərəncamçısı xidmətinin həyata keçirilməsi;

- Əsas investisiya xidmətlərinin (əməliyyatlarının) həyata keçirilməsi ilə bağlı xarici valyuta mübadiləsi.