İyul ayından etibarən Bakı Fond Birjasının (BFB) ticarət dövriyyəsinə Törəmə alətlər bazarı (foreks) üzrə əqdlərin həcmi daxil edilmir.

“Marja” xəbər verir ki, Birja, hesabatlılıq formasının hazırlanması üzrə beynəlxalq təcrübəni nəzərə alaraq aylıq dövriyyə göstəricilərini yeni formatda təqdim etməyə başladığını açıqlayıb.

2019-cu il yanvar-iyun ayları ərzində Bakı Fond Birjasında bütün alətlər üzrə keçirilən əqdlərin ümumi həcmi 8 milyard 883 milyon 618 min manat  təşkil etmişdi. Bu, 2018-ci ilin eyni dövrü ilə müqayisədə 24,3% az idi. Azalmanın əsas səbəbi törəmə alətlər bazarında əqdlərin həcminin 3,2 dəfə azalaraq 4 milyard 850 milyon manatdan 1 milyard 487 milyon manata düşməsi ilə bağlı idi.

Yanvar-iyul ayları üzrə cəmi dövriyyəyə Törəmə alətlər bazarı üzrə əqdlər daxil edilmədiyindən, Birjada 2019-cu ilin ilk yeddi ayı ərzində qiymətli kağızlar üzrə keçirilən əməliyyatların ümumi həcmi 8 milyard 682 milyon 804 min manat təşkil edib. Bu, ötən ilin 7 ayına nəzərən 14.4% çoxdur.

Göründüyü kimi, İyun ayında mənfidə olan müqayisəli yekin, İyulda müsbətə keçib.

Həmçinin BFB-nin dövriyyəsinin müqayisəli cədvəlində “Pay bazarı” və “Borc Alətləri Bazarı” sektorları birləşdirilərək “Korporativ qiymətli kağızlar” sektoru adı altında təqdim edilir. Səhm və istiqraz bazarları bu sektora daxildir.

2019-cu ilin Yanvar-İyul aylarında Azərbaycanın 8 milyard 683 milyon manatlıq qiymətli kağızlar bazarının 87,4%-i (7 milyard 585 milyon manatı) dövlət qiymətli kağızları (Mərkəzi Bankın notları, Maliyyə Nazirliyinin istiqrazları) ilə bağlı olub.

2019-cu ilin Yanvar-İyun aylarında 8 milyard 884 milyon manatlıq qiymətli kağızlar bazarının 75%-i (6 milyard 656 milyon manatı) dövlət qiymətli kağızları ilə bağlı idi. Yeni hesabatlılıq formasına keçid nəticəsində, İyun ayı ilə müqayisədə İyulda dövlət qiymətli kağızları bazarı 929 milyon manat artıb. Bu artım, dövriyyədən 1 milyard 487 milyon manatlıq törəmə alətlər bazarının çıxarılmasının böyük bir hissəsini kompensasiya edib.

Aşağıda Yanvar-İyun və Yanvar-İyul ayları üzrə BFB-nin dövriyyəsinin müqayisəli cədvəlləri verilib.