“İnkişaf üçün Maliyyə” MMC bank olmayan kredit təşkilatı (BOKT) son iki il ərzində xarici valyutada olan öhdəliklərini nəzərəçarpacaq dərəcədə azaldıb və vəziyyətini sabitləşdirib. Bunu   açıqlamasında BOKT-un direktoru Cəlal Əliyev deyib.

“Manatın birinci devalvasiyası ərəfəsində öhdəliklərimiz 16,6 mln. dollar, 1 mln. avro və 3,1 mln. manat idi. Hazırda avro ilə borcumuz ümumiyyətlə yoxdur. Cəmi 2,2 mln. dollar və 500 min manat investorlara qaytarmalıyıq. Öhdəliklərimizi ümumilikdə 7 dəfə azaltmışıq”, - deyə C.Əliyev qeyd edib.

Onun sözlərinə görə, 2017-ci ildə də rəhbərlik etdiyi BOKT müştərilərə daha çox güzəşt etməyi, ABŞ dollarında olan kreditləri bacardıqca manata çevirməyi planlaşdırır: “Hazırda əsas hədəfimiz portfelin keyfiyyətini artırmaqdır. Bunun üçün ABŞ dollarında olan kreditlər üzrə hazırda təklif edilən güzəştləri daha da genişləndirməklə borcalanları məzənnə riskindən qorumağa çalışacağıq”.

C.Əliyev onu da bildirib ki, “İnkişaf üçün Maliyyə”nın yaxın vaxtlarda yeni vəsaitlər cəlb etməklə bağlı planı yoxdur. Kreditləşmə BOKT-un öz imkanları hesabına davam etdirilir: “Biz 2015-ci ilin fevralında baş verən devalvasiyadan sonra kiçilmə strategiyasına başlamışıq. Hesab edirik ki, bu strategiyanı uğurla həyata keçirdik. BOKT-un hazırkı ölçüsü həmin vaxt müəyyən etdiyimiz hədəflərə uyğundur və indiki şərait üçün optimaldır. Məqsədimiz bu vəziyyəti qoruyub saxlamaqdır. Hazırda 13,3 mln. manatlıq kredit portfelimiz var. Onun hesabına kredit verməkdə davam edəcəyik. Azərbaycanda iqtisad vəziyyət sabitləşəndən sonra vəsait cəlbi barədə düşünmək olar”.

Onun sözlərinə görə, "İnkişaf üçün Maliyyə"nin uzun müddət əməkdaşlıq etdiyi strateji investorların bəziləri iş birliyini davam etdirməkdə maraqlıdır: “Lakin biz nə öz üzərimizə, nə də müştərilərimiz üzərinə valyuta riski qoymaq istəmədiyimiz üçün gözləmə mövqeyindəyik. Ümid edirik ki, aparılan iqtisadi tədbirlər və islahatlar nəticəsində valyuta risklərindən qorunmaq üçün alətlər formalaşacaq ki, bundan sonra genişlənmə startegiyasını həyata keçirmək olar”.

Xatırladaq ki, “İnkişaf üçün Maliyyə”ni 2002-ci ildə, Böyük Britaniyanın "OXFAM" beynəlxalq humanitar təşkilatı yaradıb. 

©Report