Artıq üç ildir ki, hər il 25 aprel Azərbaycanda “Sahibkarlar Günü” kimi qeyd edilir. Bu gün prezident İlham Əliyevin “Azərbaycan Respublikasında “Sahibkarlar Günü”nün təsis edilməsi haqqında” 21 aprel 2016-cı il tarixli Sərəncamı əsasında bayram edilir.

Azərbaycan Sahibkarlar Konfederasiyasının prezidenti Məmməd Musayevin sözlərinə görə, hazırda ölkəmizdə qeydiyyatdandan keçmiş 972 min sahibkarlıq subyekti var, onların 130 mini hüquqi şəxslərdir. Ötən illər ərzində Azərbaycanda güclü sahibkarlar sinfi formalaşıb, böyük iqtisadi islahatlar aparılması nəticəsində əlverişli biznes mühit yaranıb. 

M.Musayev xüsusən də qeyri-neft sektorunun, orta və kiçik sahibkarlığın inkişafı məqsədilə ölkəmizdə gedən islahatların mühüm rolunu vurğulayıb:

“Vergilər Məcəlləsinə ciddi əlavə və dəyişikliklər edilib, nəticədə kiçik və orta sahibkarlar mənfəətdən 75% həcmində güzəşt əldə ediblər. Gömrük Məcəlləsində nəzərdə tutulan “Yaşıl Dəhliz” prinsipi ilə işləmək isə sahibkarların idxal-ixrac əməliyyatlarını vaxt itirmədən, rahat şəkildə aparmasına imkan yaradır. Artıq ÜDM-də özəl sektorun payı 85%-ə çatıb və özəl sektor ilə dövlət arasında dialoqun qurulmasında Azərbaycan Sahibkarlar Konfederasiyası qarşısına qoyduğu hədəflər üzərində səylə çalışır”.

TƏK ŞƏXSİYYƏT VƏSİQƏSİLƏ 15 DƏQİQƏYƏ KREDİT!

M.Musayev qeyd edib ki, biznes mühitin yaxşılaşdırılması və qeyri-neft sektorunda sahibkarlığın inkişaf etdirilməsi sahəsində görülən tədbirlər nəticəsində 2004-2018-ci illərdə ölkəmizin qeyri-neft ixracı 4,1 dəfə ixrac olunan mal çeşidlərinin sayı 4,2 dəfə, hüquqi şəxslərin sayı 1,9 dəfə, kiçik müəssisələrin sayı 2 dəfə, fərdi sahibkarların sayı 5 dəfə artıb. Ümumulikdə ölkə iqtisadiyyatına 250 milyard dollar investisiya qoyulub.  

ASK prezidenti iqtisadiyyatın lokomotivi olan iş adamlarını “Sahibkarlar Günü” münasibətilə təbrik edərək onlara ölkəmizin iqtisadi inkişafı naminə uğurlar arzulayır.