Bu gün Bakı Ağır Cinayətlər Məhkəməsində mənimsəmədə təqsirləndirilən “Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev, onun bacanağı İsmayıl Hidayət-zadə, sabiq deputat Dünyamin Xəlilov, Camal Həsənov, Sərxan Rəsulov, Natiq İmanov, Samir Hacıyev, Təbriz Əbdülhəmidov, Mahir Qafarov, Sadıx Murtuzayev, Tərlan Məhərrəmov, Fəxrəddin Heybətov, Ramin Əhmədov, Fariz Muradov, Səlahəddin Qədirov, Erxan Cavad, Arif Ramazanov, Navai Şirinov, Svetlana Əsədullayeva, Arif Mədətov, Adil Mikayılov, Ramis Kərimovun cinayət işi üzrə məhkəmə iclası davam etdirilib.

Hakim Faiq Qəniyevin sədrliyi ilə keçirilən prosesdə şahid qismində Ruslan Əlixanov ifadə verib.

O, 2007-2016-ci illər arasında "General Construction" şirkətində mühasib və aparıcı mühasib vəzifəsində çalışdığını deyib: "Sənədlərdə Camal Həsənov şirkətin rəhbər idi, amma işlərə Dünyamin Xəlilov nəzarət edirdi. Banka kredit sənədlərin hazırlanıb aparılmmasına baxırdım. Təqsirləndirilən şəxslərin bir çoxunu tanıyıram, onlar keçmiş iş yoldaşlarım olub. Şirkətlərin ayrı-ayrı mühasibləri olub. Məndən başqa şirkətdə 5 nəfər mühasib çalışırdı. Əmək haqqı isə 900 manat idi".

Suallara cavab verən şahid qeyd edib ki, şirkətdə işləmək üçün CV ilə müraciət edib: "Mən ora tanışlıqla gəlməmişəm. Daha əvvəl mühasib köməkçisi və kuryer vəzifəsində çalışdım".

R.Əlixanov vurğulayıb ki, şirkətdə imza hüquqi olmayıb, lakin banklara kredit sənədlərini aparıb: "Həmin vaxt mərhum Ratmir Bəkirov yaşlı adam idi. Ona görə də banklara mən gedib, sənədləri təqdim edirdim. Həmin pullar da şirkətə verilirdi. Mənim banka getməyimə Dünyamin Xəlilov göstəriş vermişdi".

Daha sonra digər şahid Tahir Balaqadaşov dindirilib. Onun sözlərinə görə, 2012-ci ilə qədər Beynəlxalq Bankda çalışıb.

Şahid deyib ki, Akif Əliyevin göstərişi ilə D.Xəlilovun şirkətinə 1.5 milyon manatlıq kredit verilib: "Kreditin təyinatı yox idi. Bu barədə Akif Əliyevdən soruşanda bildirdi ki, Dünyamin Xəlilovun nəzarətində olan şirkətə kredit Cahangir Hacıyevin tapşırığı ilə ayrılır. Mən də onun göstərişini əməl etmişəm".

Məhkəmədə elan olunub ki, hazırda işsiz olan T.Balaqadaşovun barəsində cinayət təqibi davam etdirilir.

Şahid qismində ifadə verən Akif Əfəndi söyləyib ki, Beynəlxalq Bankın sabiq filial müdridir. Onun sözlərinə görə, bankdan D.Xəlilova məxsus şirkətlərə kredir ayrılıb: "Bu barədə Kredir Komitəsi tərəfindən tapşırıq verilmişdi. Həmçinin Zaqatala Olimpiya Kompleksinin tikintisi üçün də bankdan kredit ayrılmışdı".

Elan olunub ki, filial rəhbəri olmuş A.Əfəndi Zaqatalada aparılan tikinti işləri ilə bağlı 7 milyon manatdan artıq kredit verib.

Məhkəmənin növbəti iclası aprelin 1-nə təyin edilib. 

TƏK ŞƏXSİYYƏT VƏSİQƏSİLƏ 15 DƏQİQƏYƏ KREDİT!

© Report