Kənd Təsərrüfatı Nazirliyi Azərbaycanda zəfəran istehsalının genişləndirilməsi ilə bağlı dövlət proqramı həyata keçirməyi planlaşdırır.

Bu barədə açıqlamasında qurumun bitkiçiliyin təşkili və monitorinqi şöbəsinin müdir müavini Fərman Kərimov məlumat verib.

“Hazırda Azərbaycanda zəfərana olan tələbat daha çox İrandan ucuz idxal hesabına ödənilir. Halbuki, yerli məhsulun keyfiyyəti nəinki İranda, hətta İspaniya və İtaliyada yetişdirilən zəfəranın keyfiyyətindən yüksəkdir. Əgər Qida Təhlükəsizliyi Agentliyi bu istiqamətdə monitorinqlər aparsa, daxili bazardan İranın saxta və keyfiyyətsiz zəfəran yığışdırılsa, yerli fermerlərin məhsullarına tələbat yaranar. Bununla da, nəinki daxili tələbat ödənilər, həm də ixrac hesabına ölkəyə valyuta daxil olar. Bütün bu perspektivləri nəzərə alınaraq zəfəranla bağlı dövlət proqramının hazırlanması, bu sahədə seleksiya və toxumçuluq işlərinin görülməsi nəzərdə tutulub”, - deyə o, qeyd edib.

Nazirlik rəsmisinin sözlərinə görə, hazırda ölkədə zəfəran əkini sahələri SSRİ dövrü ilə müqayisədə təxminən 30 dəfə azdır: “Əvvəllər Bakı, Gəncə və Şəkildə 430 hektar ərazidə zəfəran əkilib. Hazırda yalnız Bakının Zirə qəsəbəsində 6,5 hektar ərazidə zəfəran var. Bu rəqəmin 12 hektara çatdırılması nəzərdə tutulub. Bundan başqa, SSRİ dövründə Bakının Bilgəh qəsəbəsində 18 hektar ərazisi olan zəfəran sovxozu var idi. Ondan da 8 hektar qalıb. Əvvəllər Azərbaycanda ildə 600 kq zəfəran istehsal olunardı, hazırda bu rəqəmin nə qədər olduğu məlum deyil. Gələn ildən statistika aparılacaq”.

F.Kərimov onu da qeyd edib ki, gələcəkdə zəfəran istehsalçılarına da subsidiya verilə bilər: “Nazirlər Kabinetinin subsidiya ilə bağlı 103 saylı qərarında zəfəran istehsalının stimullaşdırılması məsələsi yer almayıb. Gələcəkdə bu məsələnin həmin qərara salınmasını təklif edəcəyik. Çünki kifayət qədər vacib sahədir. Zəfərandan 300 adda dərman preparatı hazırlanır. Bunlar əsasən ürək-damar və onkoloji xəstələri üçündür. Həmçinin zəfəran 50-yə yaxın şirniyyat növünün tərkibində istifadə edilir. Bir müddət əvvəl ölkədə zəfəran balını istehsal etməklə bağlı təklif irəli sürülmüşdü. Sözügedən addım reallaşsa, bu, Azərbaycanın brendi ola bilər”.  

ELƏ İNDİCƏ 3% ENDİRİMLƏ KREDİT ƏLDƏ ET

© Report