“Azəripək” MMC-nin (keçmiş “Şəki-İpək” ASC) fəaliyyəti  əhəmiyyətli dərəcədə canlanıb.Avqustun ortalarından etibarən müəssisənin baramaaçan istehsalatı işə salınıb və burada yenidən xam ipək istehsalına başlanılıb.

İstehsalatın meneceri Əsabəli Nəzərovun bildirdiyinə görə, rayonlardan tədarük edilən yaş barama əvvəlcə müəssisənin xammal şöbəsinə və barama çeşidləyici sexinə daxil olur. Təmizləndikdən sonra barama müəssisənin bu istehsal sahəsinə gətirilir.

Hazırkı xammal ehtiyatı ilə “Azəripək” MMC-nin baramaaçan istehsalatı ilboyu fasiləsiz fəaliyyət göstərəcək

İstehsalatın meneceri deyib ki, baramaaçan istehsalatının birnövbəli iş rejimində ilboyu fəaliyyət göstərməsi üçün 120 ton quru barama tələb olunur. Hazırkı xammal ehtiyatı ilə bu istehsal sahəsi növbəti barama mövsümünədək fasiləsiz fəaliyyət göstərə biləcək.

Qeyd edək ki, buraxılan məhsulun keyfiyyətini yaxşılaşdırmaq məqsədilə 2008-ci ildə baramaaçan istehsalatında yenidənqurma işləri aparılıb, burada Çində istehsal olunan yeni, müasir baramaaçan, barama sarıyan, barama buğa verən dəzgahlar, vakuum aparatı quraşdırılıb. Yenidənqurma işlərindən sonra bu istehsalatda əmək məhsuldarlığı bir neçə dəfə artıb.

Avtomat dəzgahların məhsuldarlığı mexanikilərdən 3 dəfə çoxdur

Əsabəli Nəzərovun sözlərinə görə, hazırda istehsalatda olan mexaniki dəzgahların yarısı, avtomat dəzgahların isə hamısı işlək vəziyyətdədir. Avtomat dəzgahlarda gün ərzində orta hesabla 90-95 kiloqram, mexaniki dəzgahlarda isə 32-33 kiloqram xam ipək istehsal olunur. Burada istehsal edilən xam ipək sonra istehsalatın ipək otağına gətirilir, tikilir, ovulur, keyfiyyəti müəyyənləşdirilir, yenidən qablaşdırılır, kipləşdirilir və mərkəzi anbara göndərilir.

Fəaliyyətə başladığı gündən indiyədək baramaaçan istehsalatında 3 tona yaxın xam ipək istehsal olunub. Ümumiyyətlə, bu il tədarük olunan yaş baramadan 50 tondan çox xam ipəyin istehsal edilməsi proqnozlaşdırılır. Ötən il isə müəssisədə 27 ton yüksək keyfiyyətli xam ipək əldə edilib.

Hazırda baramaaçan istehsalatında 181 işçi çalışır. Onların orta aylıq əmək haqqı 200 manatdan yuxarıdır.

İşçilərlə söhbət zamanı baramaaçanlar Əminə Qaflanova, Vüsalə Ramazanova, təkrar sarıma dəzgahında çalışan Sevil Cabbarova, ipək otağının işçisi Gültəkin Həmidova və başqaları ölkəmizdə baramaçılığın və ipəkçiliyin inkişafına, həmçinin müəssisənin fəaliyyətinin bərpa olunmasına göstərdiyi diqqət və qayğıya görə kollektiv adından dövlətimizin başçısına minnətdarlıqlarını ifadə ediblər. Onlar qarşıya qoyulan vəzifənin öhdəsindən uğurla gələcəklərinə əminliklərini bildiriblər.

© Azərtac