“Azərbaycan Sənaye Bankı” ASC (ASB) 2018-ci ilin 9 ayını 4 milyon 705 min manat xalis mənfəət ilə başa vurub. Müqayisə üçün qeyd dək ki, Bank ötən ilin eyni dövründə 4 milyon 619 min manat xalis mənfəətlə bağlamışdı. Beləliklə, Bankın xalis mənfəəti cüzi (1,9%) artıb.

“Marja” Bankı maliyyə hesabatlarına istinadən xəbər verir ki, cari ilin yanvar-sentyabr dövründə "Azərbaycan Sənaye Bankı"nın cəmi gəlirləri 23 milyon 445 min manat,  o cümlədən faiz gəlirləri 18 milyon 501 min manat, qeyri-faiz gəlirləri 4 milyon 943 min manat təşkil edib.

GƏLİRİ AZALIB, XƏRCİ ARTIB

Cari ilin 9 ayı ərzində Bank 23 milyon 445 min manat cəmi gəliri əldə etmək üçün 18 milyon 366 min manat xərc çəkib. Nəticədə, Bankın 5 milyon 79 min manat əməliyyat mənfəəti yaranıb. 

2017-ci il 9 ayında ASB 24 milyon 200 min manat cəmi gəliri (17 milyon 920 min manatı faiz, 6 milyon 280 min manatı qeyri-faiz) əldə etmək üçün 17 milyon 621 min manat xərc çəkmişdi. Nəticədə, ASB-nin əməliyyat mənfəəti 6 milyon 579 min manat təşkil etmişdi. 

2017-ci ilin 9 ayı ərzində ASB 6 milyon 579 min manat əməliyyat mənfəətinin 760 min manatını ehtimal olunan kredit və depozit itikiləri üçün yaradılan ehtiyata ayırmışdı. Cari ilin 9 ayında isə ehtiyatlardan 761 min manatı azad olaraq emənfəətə əlavə edilib.

MÜŞTƏRİLƏRƏ VERİLƏN KREDİTLƏR AZALIB

30 Sentyabr 2018-ci il tarixinə ASB-nin aktivləri 1 milyard 7 milyon manat təşkil edib. Bank. 31 Dekabr 2017-ci il tarixində 945 milyon manat, 30 İyun 2018-ci il tarixində isə 1 milyard 19 milyon manat cəmi aktivlərə malik idi.

Ötən ilin sonu ilə müqayisədə Bankın müştərilərə verdiyi kreditlər 298 milyon 857 min manatdan 287 milyon manata geriləyib.

MƏCMU KAPİTALI AZALIB

30 Sentyabr 2018-ci il tarixində ASB 66 milyon 265 min manat məcmu kapitala malik olub. Bank 31 Dekabr 2017-ci il tarixində 78 milyon 180 min manat məcmu kapitala malik idi. Məcmu kapitalın azalmasının səbəbi məcmu kapitaldan tutulmaların 5 milyon 790 min manatdan 23 milyon 399 min manata yüksəlməsidir. 

“Azərsun Holdinq”ə daxil olan “Azərbaycan Sənaye Bankı” ASC-nin səhmlərinin 98,4252%-i “Anadolu İnvestment Kompani” MMC –yə, 1%-i Leyla Goozala, 0,5748%-i Azərbaycan Sənaye Lizinq Şirkətinə  məxsusdur.