Oktyabrın 4-də “Yaşıl çay” FT MMC-nin kollektivi tritikale əkininə başlayıb.

“Yaşıl çay”ın məlumatına görə, çoxprofilli təsərrüfatda çayçılıqla yanaşı, ölkəmizin ərzaq təhlükəsizliyində mühüm rol oynayan heyvandarlığın inkişafına da ciddi diqqət yetirilir. 300 başdan artıq iribuynuzlu heyvanın saxlandığı fermanın yemlə təmin olunması üçün təsərrüfat ənənəvi yemlərlə yanaşı, daha səmərəli qüvvəli yem növlərinin tədarükünə də xüsusi maraq göstərir.

 Bu məqsədlə kollektiv 2017-ci ildə ilk dəfə olaraq sınaq məqsədilə Azərbaycan Elmi-Tədqiqat Əkinçilik İnstitutunun Tərtər bölgə təcrübə stansiyasında alınmış “Ləyaqət” və “Samur” sortundan istifadə etməklə əkin keçirib.

Tritikale nədir?

Tritikale buğda və çovdarın hibrididir. Özündə buğdaya və çovdara xas olan müsbət irsi əlamətləri birləşdirilmişdir. Buğdadan sünbülün (sünbülcüklərin) çiçəkliyini, dənin keyfiyyətini və iriliyini: çovdardan isə şaxtaya davamlılığı, güclü kollanmağı, sünbülün uzunluğunu, sürətlə inkişaf etməyi, göbələk xəstəliklərinə davamlı olmaq kimi müsbət əlamətləri özünə keçirmişdir. Dənində 15-18 faiz zülal olur. Buğdaya nisbətən zülalı 1-1,5 faiz, çovdara nisbətən isə 3-4 faiz artıq olur.

 Təsərrüfatın rəhbəri Araz Yaqubovun dediyinə görə, Azərbaycan Elmi-Tədqiqat Əkinçilik İnstitutunun Tərtər bölgə təcrübə stansiyasından aldığımız elit tritikale sortu yüksək məhsuldarlığı ilə diqqəti cəlb edib. Belə ki, keçən il hər hektardan 45 sentner məhsul götürdük. Qərara aldıq ki, keyfiyyətcə arpadan geri qalmayan, məhsuldarlığına görə isə onu qat-qat üstələyən tritikale əkin sahələrini bu il daha da artıraq. 

Hazırda səpin gedən sahələrdə olduq. Burada təsərrüfatın icraçı direktoru Elşad Yaqubovla görüşdük. O, tritikale əkini ilə bağlı məlumat verərək bildirdi ki, artıq 8 hektara yaxın sahə bu məqsədlə hazır vəziyyətə gətirilib. Bu gündən başlayaraq səpinə başlamışıq. Havalar imkan verərsə, qısa müddətdə nəzərdə tutduğumuz səpin işlərini başa çatdıracağıq. 

Qeyd edək ki, alimlərin tədqiqatlarına görə tritikale həqiqətən məhsuldar, xəstəliyə davamlı, daha az sahədə bol məhsul verən taxıl növüdür. Ona görə də heyvandarlıqla məşğul olan aztorpaqlı təsərrüfatçıların tritikale əkininə üstünlük verməsi daha məqsədəuyğun sayılır.