"Yalama Aqropark"ın heyvandarlıq təsərrüfatı saxlanılan heyvan sayı, həmçinin daimi işçi heyətinin sayına görə ölkə üzrə fəaliyyət göstərən ən iri heyvandarlıq təsərrüfatlarından biridir. 

“Yalama Aqropark” MMC-nin direktoru Zaur Əliyev "Marja"ya bildirdi ki, heyvandarlıq təsərrüfatında Avstriya və Almaniyadan gətirilmiş 1113 baş simmental cins inəklərdən balalar alınmış və hazırda təsərrüfatımızda cəmi heyvan sayı 2600 başa bərabərdir:

"Artıq gətirilmiş cins heyvanlardan 3-cü balalar alınmağa başlanılmışdır. 2018-ci ilin ilk 9 ayı ərzində 82 düyədən ilk balalar alınmış və ilin sonuna qədər bu rəqəmin 250-ə çatması planlaşdırılır. Bununla da sürü üzrə sağmal inək sayının artmasını və təsərrüfata kənardan heyvan alışının dayandırmasını təmin ediləcəkdir. Heyvan sayının artırılması ilə yanaşı heyvandarlıq sahəsi üzrə itkilərin minimuma endirilməsi və digər keyfiyyət göstəricilərinə nail olmaq üçün işlərimizi davam etdiririk. Təsərrüfatda buzov itkilərinin 3% və inək itkilərinin 2% həcmindədir ki, bu da dünya üzrə heyvandarlıq sahəsi üzrə qabaqcıl nəticə hesab edilir. Heyvandarlıq təsərrüfatında orta məhsuldarlıq 23-24 litrdir".

500 TON ARTIQ SÜD İSTEHSAL OLUNUB

Zaur Əliyev əlavə etdi ki, hal-hazırda heyvandarlıq sahəsi üzrə gündəlik istehsal həcmi hazırda 16 tona bərabərdir: "2018-ci il ərzində 5800 ton süd və 255 ton diri çəkidə ət istehsal proqnozlaşdırılır. İlin ilk 8 ayı ərzində 3700 ton süd istehsal edilmişdir ki, bu keçən il ilə müqayisədə 500 ton artıqdır. Ümumilikdə 2018-ci il süd istehsalında 1000 ton artıma nail olunması nəzərdə tutulmuşdur".

SÜD EMALI ZAVODU TİKİLƏCƏK

Zaur Əliyev qeyd etdi ki, 2018-ci ilin ilk yarısında süd satışı bazarında olan çətinliklər süd emalı zavodunun tikintisi layihəsini daha da aktuallaşdırmışdır: "Hazırda emal gücü 50 ton olan süd emalı zavodunun qurulması üçün texniki-iqtisadi əsaslandırma (feasibilty study) işləri aparılır. Bu məqsəd üçün Türkiyə Respublikasında bir neçə müəssisə və istehsalçılara səfər edilmişdir. Texnoloji planlaşdırma işlərini tamamlamaq üçün növbəti ay Almaniya Respublikasından mütəxəssis dəvət edilmiş və texnoloji planlama işlərinin tamamlanması nəzərdə tutulmuşdur. Həmçinin paralel bazar araşdırması davam edir. Aparılan araşdırmalar nəticəsində növbəti il üçün emal zavodunun qurulması üzrə investisiya qərarı veriləcəkdir".

“Yalama Aqropark” MMC-nin direktoru Zaur Əliyevin "Marja"ya geniş müsahibəsini buradan oxuya bilərsiniz.