2018-ci ilin ilk yarım ili üzrə Dövlət Neft Fondunun vəsaitlərinin idarə edilməsindən 507,9 mln. manat və yaxud 475,7 mln. ABŞ dolları məbləğində gəlir əldə edilmişdir.

“Marja” 2018-ci ilin yanvar-iyun aylarında Azərbaycan Respublikası Dövlət Neft Fondunun büdcəsinin icrası haqqında məlumata istinadən xəbər verir ki, 2018-ci ilin ilk yarımilliyi üzrə ARDNF-nin investisiya portfelinin gəlirliliyi 1,29% təşkil etmişdir ki, nəticədə bu ötən ilin müvafiq göstəricisi (2017-ci ilin ilk yarımilliyi üzrə 1,12%) ilə müqayisədə 0,17 faiz bəndi artmışdır.

Fondun 2018-ci il üzrə qəbul edilmiş investisiya siyasətinə əsasən investisiya portfelinin minimum 60,0%-i borc öhdəlikləri və pul bazarları alətlərindən, 25,0%-i 4 səhmlərdən (pay), 10,0%-i daşınmaz əmlakdan və 5,0%-i isə qızıl alt portfellərindən ibarət müəyyən olunmuşdur.

2018-ci ilin 30 iyun tarixinə Fondun səhm portfeli təqribən 5326,6 mln. ABŞ dolları təşkil etmişdir. Bu portfelə “MSCI World”, “MSCI Europe ex UK” və “Standard and Poor’s 100” indekslərinə daxil olan şirkətlərin səhmləri, eləcə də Rusiya Federasiyasının aparıcı banklarından biri olan VTB bankının səhmləri, habelə Beynəlxalq Maliyyə Korporasiyası tərəfindən idarə olunan “ALAC” (Afrika, Latın Amerikası, Karib hövzəsi ölkələri), “Katalist” və “Global İnfrastruktur” özəl səhm fondlarına, eləcə də fərqli mandat üzrə “Neuberger Berman” şirkətinin idarəetməsində olan özəl səhm fonduna, Avropa Yenidənqurma və İnkişaf Bankı (AYİB) tərəfindən idarə olunan “EPF”fonduna, “Blackstone Core Equity Partners” fonduna və “Azerbaijan Rigs” Məhdud Məsuliyyətli Cəmiyyətinə olan investisiyalar daxil olmuşdur. Səhm, özəl səhm portfeli üzrə ümumi gəlirlilik 0,95% təşkil etmişdir.

Neft Fondunun daşınmaz əmlak komplekslərinə investisiyaların ümumi miqdarı 2251,1 mln. ABŞ dolları təşkil etmişdir. Əlavə edək ki, 2018-ci ilin birinci yarısında “ARES”, “GreenOak” və “PAG Real Estate” tərəfindən idarə olunan daşınmaz əmlak fondlarına yatırımlar edilmiş, eləcə də “Gaw Capital” və “Capital Holding Sarl” ilə birlikdə müştərək investisiyalar həyata keçirilmişdir.

2017-ci ilin sonuna qızılın ümumi miqdarı 30174,9 kq (970145,51 troya unsiyası) təşkil etmişdir. Cari ilin iyun ayında əlavə olaraq 2799,31 kq (90000,0 troya unsiyası) alınması ilə Fondun investisiya portfelinə daxil olan qızılın ümumi miqdarı 2018-ci ilin 30 iyun tarixinə 32974,21 kq (1060145,51 troya unsiyası) və yaxud 1326,5 mln. ABŞ dolları təşkil etmişdir. 30 iyun 2018-ci il tarixinə Azərbaycan Respublikası Mərkəzi Bankı və Azərbaycan Beynəlxalq Bankının hesablarında Fondun 451,6 mln. manat (və ya 265,6 mln. ABŞ dolları) məbləğində vəsaiti cəmlənmişdir.