Azərbaycan Respublikasının Maliyyə Sabitliyi Şurasına 2017-ci ilin sonuna qədər “2017-ci ilə və ortamüddətli dövrdə makroiqtisadi və maliyyə sabitliyinin təmin olunması üzrə tədbirlər planı”nın (Tədbirlər planı) təsdiq edilməsi və bu tədbirlərin icrasının təmin edilməsi tapşırığı verilmişdir.

“Marja” Dövlət Neft Fondunun illik hesabatına istinadən xəbər verir ki, Şuranın 29 dekabr 2016-cı il tarixli qərarı ilə xarici valyutada olan bir sıra öhdəliklərin makroiqtisadi çərçivədən kənarda tənzimlənməsi məqsədilə ARDNF-dən ARMB-yə transfertin yuxarı həddi 3,5 milyard ABŞ dolları məbləğində müəyyən edilərək, Tədbirlər planına uyğun olaraq bu məbləğin Mərkəzi Banka transfertin edilməsi barədə ARDNF-yə tapşırıq verilmişdir.

"Müvafiq olaraq, ARDNF-nin 2017-ci il büdcəsi haqqında Azərbaycan Respublikası Prezidentinin Fərmanı ilə ARDNF-nin 2017-ci il büdcəsində makroiqtisadi sabitliyin təmin edilməsi məqsədilə ARMB-yə transfertin yuxarı həddi ilə bağlı 7 milyard 500 milyon manat məbləğində müvafiq xərc maddəsi təsdiq edilmişdir. Hesabat ili ərzində qeyd edilən xərc maddəsi üzrə 3 milyard 949,5 milyon manat və yaxud 2 milyard 263,0 milyon ABŞ dolları məbləğində vəsait ARMB-yə transfert edilmişdir",- hesabatda deyilir.

Qaçqınların və məcburi köçkünlərin sosial-məişət vəziyyətinin yaxşılaşdırılması tədbirlərinin maliyyələşdirilməsi.

2017-ci ildə də “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı” layihəsinin ARDNF tərəfindən maliyyələşdirilməsi davam etdirilmişdir. 2001-2017-ci illər ərzində bu tədbirlərin maliyyələşdirilməsi məqsədi ilə ARDNF-nin büdcəsindən ümumilikdə 2 milyard 102,8 milyon manat vəsait xərclənmişdir .Bununla yanaşı, hesabat ilində ARDNF tərəfindən qaçqın və məcburi köçkünlərin mənzil-məişət şəraitinin yaxşılaşdırılması üçün 105 milyon manat vəsait ayrılmışdır.

Dövlət büdcəsinə transfert

Hesabat ilində dövlət büdcəsinə transfertin həcmi 6 milyard 100 milyon manat təşkil etmişdir ki, bu da 2016-cı ilin eyni göstəricisi ilə müqayisədə 20% və ya 1 milyard 515 milyon manat aşağıdır.   2003-2017-ci illərdə ARDNF tərəfindən dövlət büdcəsinə transfertin cəmi həcmi 77,62 milyard manat və ya ARDNF-nin bugünə qədər olan cəmi büdcə xərclərinin 85,7%-ni təşkil etmişdir. 2017-ci ildə ARDNF-dən dövlət büdcəsinə transfert dövlət büdcəsinin gəlirlərinin 36,9%-ni, dövlət büdcə xərclərinin isə 34,7%-ni təşkil etmişdir.

“2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın maliyyələşdirilməsi.

“Qara qızılın insan kapitalı”na çevrilməsi ideyasının reallaşdırılmasına yönəldilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın maliyyələşdirilməsi ARDNF tərəfindən həyata keçirilir. 2017-ci ildə Azərbaycan Respublikası Təhsil Nazirliyinin sifarişlərinə əsasən ARDNF-dən Dövlət proqramının maliyyələşdirilməsi məqsədi ilə ayrılmış 17,01 milyon manat vəsaitin 7,87 milyon manatı yaşayış, 8,25 milyon manatı təhsil, təqribən 0,55 milyon manatı yol, 0,33 milyon manatı tibbi sığorta, 0,01 milyon manatı viza və qeydiyyat və digər xərclərin ödənilməsinə yönəldilmişdir.