ABŞ-da məşğulluq Yanvarda 227 minlə proqnozdan yüksək artıb.

Qlobal bazarların səbirsizliklə gözlədiyi ABŞ-da kənd təsərrüfatı xaric məşğulluq məlumatı və işsizlik göstəricisi açıqlandı.

“Marja” xəbər verir ki, Yanvar ayında ABŞ iqtisadiyyatı kənd təsərrüfatı xaricində 227 min məşğulluq yaradıb. Məşğulluğun 175 min artacağı gözlənirdi. Beləliklə, məşğulluq artımı proqnozdan yüksək çıxıb. Bu rəqəm 4 ayın ən yaxşı artımı olub.

İşsizlik nisbəti isə 4,8%-ə qalxıb. İqtisadçılar işsizlik nisbətinin dəyişməyərək 4,7%-də qalacağını gözləyirdilər.  

Saatlıq orta əmək haqqı aylıq 0.1%, illik 2.5% artıb. İllik artım Avqustdan bəri ən aşağı səviyyədə olub. Maaş artımları proqnozdan aşağı qalaraq məşğulluq bazarında hələ də zəiflik olduğuna işarə edib.

Dekabr ayının məşğulluq göstəricisi 156 mindən 157 minə dəyişdirilib.

Məşğulluq və işsizlik göstəricisi ABŞ Mərkəzi Bankı Fed-in faiz artırımı prosesində baxdığı ən mühüm məlumatlardır.

Kənd təsərrüfatı xaric məşğulluq - kənd təsərrüfatı xaricində son ay ərzində çalışan insanların sayındakı dəyişiklikləri müəyyən edir. Yuxarı istiqamətdə bir tendensiya ölkənin pul vahidinə müsbət təsirə malikdir. İş yerləri, insanların qazanc əldə etməsi və müvafiq olaraq istehlakın artması Ümumi Daxili Məhsula müsbət təsir edir.

Fed rəsmiləri bu həftəki toplantısında faizləri dəyişdirməyərək məşğulluq bazarında yaxşılaşma üçün hələ də bir az yer olduğunu bildirmişdi.

Barak Obamanın ABŞ Prezidentiliyinin son ayına təsadüf edən bu rəqəmlər məşğulluq bazarının sabit inkişafına işarə etsə də, əməkhaqlarının hələ kifayət qədər yaxşılaşmadığı görünür. Yeni Prezident Donald Trump vergi güzəştləri və infrastruktur investisiyaları ilə maaş artımlarını dəstəkləyəcəyini və əməyinə iştirakını artıracağını vəd edir.

Məlumatların açıqlanmasından sonra Dollar mühüm valyutalar qarşısında az da olsa bahalaşıb.