Bakıda ilk dəfə olaraq bitki klinikası fəaliyyətə başlayıb.

Dünyada çox az sayda olan bitki klinikalarından biri də MDB ölkələri arasında ilk olaraq Azərbaycanda “Aqroservis” şirkətinin nəzdində açılıb.

“Aqroservis” kənd təsərrüfatı məhsullarının istehsalı ilə yanaşı, kənd təsərrüfatı vasitələrinin (pestisid, gübrə, toxum, maşın və avadanlıqlar) Avropa ölkələrindən idxalı və satışı ilə məşğul olur.

“Aqroservis” şirkətinin baş direktoru Hüseyn Hüseynov bildirib ki, çox az sayda bu konsepsiyada yanaşmalar mövcuddur:

“Klinikanın əsas fəaliyyət sahəsindən biri də fermerlərə ödənişsiz olaraq məsləhət xidməti göstərməkdir. Bu sahədə daha da peşəkarcasına xidmət göstərmək məqsədilə tərəfimizdən 2017-ci ildə “Kənd təsərrüfatı vasitələrinin “Sərgi satış mərkəzi” və “Bitki klinikası” inşa edilib. Dünyada mövcud olan bitki klinikalarından fərli olaraq, bizim yaratdığımız klinika öz konsepsiyasına görə bir az fərqlidir. Belə ki, biz məsələyə daha kompleks şəkildə yanaşmağa çalışmışıq”.

H. Hüseynovun sözlərinə görə, bitki klinikası və sərgi-satış mərkəzinin fəaliyyəti bitki xəstəliklərinin və zərərvericilərin diaqnostikası, torpaq və bitki analizi, analizlərin nəticələrinə əsasən tövsiyələrin verilməsi, müvafiq bitki mühafizəsi və digər kənd təsərrüfatı vasitələrinin təchizatı, həmçinin tədris-təcrübə kurslarının təşkilindən ibarət olacaq.

O qeyd edib ki, bitki klinikasında həmçinin xəstəlik və zərərvericilərin elektron albomu, zərərvericilərin kolleksiyası, alaq otlarının və xəstəliklərin herbarisi təşkil edilib: “Bu elektron albom və zərərvericilərin kolleksiyası, alaq otlarının və xəstəliklərin herbarisi bizə və fermerlərə rastlaşdığımız ziyanverici obyektin təyin edilməsində  yardımçı olur”.

Şirkətin baş direktoru deyir ki, fermer əkdiyi bitkilərdə bir xəstəlik və ya zərərverici aşkar etdikdə, bu klinikaya müraciət edə bilər: “Onların köməyi ilə yerində vizual baxış keçirilir. Əgər yerində xəstəliyə və zərərvericiyə diaqnoz qoyula bilmirsə, bizim mütəxəssislərin və laboratoriyanın köməkliyi ilə  diaqnoz qoyulur və  mübarizə tədbirləri planı tərtib edilir.

H. Hüseynov bildirib ki, həmçinin burada klinikanın yanında dərmanların satışı da təşkil olunub: “Bitkiçilikdə istifadə olunan dərmanlarda saxtalaşdırma halları çoxdur. Bu səbəbdən də klinikanın yanında “Sərgi-satış mərkəzi”ndə bitki mühafizəsi vasitələrinin və digər kənd təsərrüfatı vasitələrinin satışını da təşkil etmişik. Burada satılan dərmanların hamısı ABŞ, Fransa, Belçika və  İsveçrə  firmaların istehsalı olan dərmanlarıdır. Bu dərmanların keyfiyyətinə biz inanırıq. Burada fermerlərə dərman və digər vasitələr  təqdim edilir”.

Peşəkar mütəxəssislərin çalışdığı klinikada fermerlərin köməyinə çatacaq kitabxana da fəaliyyət göstərir. O bildirib ki, gələcəkdə Azərbaycanın regionlarında da belə bitki klinikaları açmağı planlaşdırılır.

© APA