Xəbər verdiyimiz kimi, bu gün Bakı Fond Birjasında (BFB) “MET-AK” MMC-nin faizli, sənədsiz, adlı, təmin edilməmiş istiqrazlarının yerləşdirilməsi üzrə hərrac baş tutmayıb. Hərrac "texniki problemə görə" gələn həftəyə təxirə salınıb.

"Elan edildiyi kimi, yerləşdirmənin anderrayteri "AzFinance" İnvestisiya Şirkəti QSC-dir. Şirkətdən bizə bildirildi ki, istiqrazlara sifarişlər olub, lakin şirkətdən qaynaqlanan texniki problem yaranıb. Onlar problemi bizə aydın izah etməyiblər. Sadəcə narahat olmamağımızı, hərracın gələn həftə keçiriləcəyini bildirdilər"- "Marja"ya "Metak" şirkətindəki mənbəsi bildirib.

“AzFinance” investisiya şirkəti istiqrazın reklamına başlayıb. Bu, kifayət qədər sifarişin toplanmadığına işarədir.

"AzFinance" investisiya şirkətinin məlumatına görə, “Metak” istiqrazlarının 2018-ci ildə ən yaxşı investisiya aləti olacağı hesab olunur:

“Belə ki, adı çəkilən istiqrazın gəlirliyi bankların təklif etdiyi gəlirlikdən yüksəkdir. Hazırda banklarda manatla depazitlər illik 10%-13% , dollarda 1%-3% olduğu halda “Metak” istiqrazlarında təklif olunan illik 14%-dir

Riski bankların riskindən azdır

Bundan başqa banklarda xarici valyuta məzənnələrində yarana bilən və ya bankın əleyhinə olan dəyişikliklərdən, həmçinin bankın xarici valyutada olan aktivlərinin dəyərdən düşməsi nəticəsində, bank riskləri yarana bilər. Bundan başqa banklara xas olan bir neçə likvidillik risklərinin(Kreditlər üzrə ödənişlərin gecikdirlməsi nəticəsində yaranan likvidlik riski, müştərilərin vəsaitlərinin vaxtından əvvəl çıxarılması nəticəsində yaranan likvidlik riski, kredit xəttlərindən həddindən çox istifadə edilməsi nəticəsində yaranan likvidlik riski, aktivlərin və passivlərin ödəniş müddətləri arasındakı, habelə, müddətlərə bağlı olaraq məbləğlər arasında yaranan uyğunsuzluq və uçurum nəticəsində yaranan likvidlik riski) olduğu halda “Metak” istiqrazlarında bu risklər demək olar ki, sıfıra bərabərdir. Çünki bir qayda olaraq istiqraz verən, istiqraz ixrac edən şirkətin mənfəət-zərər riskinə qatılmır. Gəliri hər zaman sabitdir. Məhz bu göstəriciyə görə istiqrazlar səhmlərdən də üstün sayılırlar. Çünki səhmlərdə səhm sahibləri şirkətin aktivlərindən bütün borclar ödənildikdən sonra qalan gəliri bölür

İlin əvvəlində investisiya edib il ərzində gəlir götürmək mümkündür

Metak istiqrazlarına sahib olanlar ilin əvvəlində investisiya edib il ərzində gəlir götürmək imkanına malik olacaqlar. Belə ki, İstiqrazlar üzrə ödənilməli olan faizlər buraxılışda olan ilk istiqrazın yerləşdirildiyi tarixdən etibarən dövri olaraq hər 3 aydan bir ödəniləcəkdir.

Əlavə olaraq, İstiqrazların Emitent tərəfindən qanunvericiliyin tələblərinə uyğun şəkildə, istiqrazları ilkin yerləşdirmədə əldə etmiş investorlar tərəfindən 6 aydan sonra geri satın alınmasına imkan verir.

Likvidillik

Metak istiqrazlarının likvidilliyi yüksəkdir. Belə ki, AzFinance hər bir alıcıya onun istədiyi tarixdə istiqrazları geri almaq barədə seçim təqdim edir.

Bununlada Azərbaycanda ilk dəfə AzFinance investisiya şirkəti müəssisə istiqrazına sahib olmaq imkanı yaradır

Metak istiqrazları bir illikdir və bu istiqrazları bir il saxlayıb daha sonra AzFinance investisiya şirkətinə satmaq mümkündür.

Alternativlər daha aşağı faizli gəlirlər vəd edir

Metak istiqrazların alternativ olan digər korporativ istiqrazlar 5%-6% təklif etdikləri halda Metak istiqrazları illik 14 % gəlıirlilik təklif edir. Qeyd edək ki, Metak istiqrazlarının yerləşdirilməsi xarici valyutanın stabilliyi dövrünə təsadüf edir”,- "AzFinance"ın məlumatında deyilir.

Xəbər verdiyimiz kimi, "MET-AK"ın emissiyasının həcm 2 000 000 AZN olmaqla, hər birinin nominal qiyməti 1000 AZN olan 2000 ədəd istiqrazdan ibarətdir. İstiqrazların tədavül müddəti  1 il (365 gün), faiz dərəcəsi (illik) 14 %, faiz gəlirinin ödəniş müddəti 3 aydan birdir (90 gün).

Əlavə edək ki, MET-AK istiqrazları BFB-nin Listinq Məsləhət Proqramı çərçivəsində listinqə alınmışdır.

Anderrayter - emitentlə (qiymətli kağızı buraxan) investorlar arasında vasitəsi kimi çıxış edən, qiymətli kağızlar buraxılışının ilkin yerləşdirilməsinə və satışına zəmanət verən və onu təşkil edən şirkətdir.