Türkiyənin Mardin və Rusiyanın Kostroma vilayətlərindən Azərbaycana diri quş, quş əti və quşçuluq məhsulları idxal olunmur.

Bunu açıqlamasında Kənd Təsərrüfatı Nazirliyi yanında Dövlət Baytarlıq Nəzarəti Xidmətinin mətbuat xidmətinin rəhbəri Yolçu Xanvəli bildirib.

Qonşu ölkələrdə aşkarlanan “quş qripi” virusunun Azərbaycana keçmə təhlükəsi ilə bağlı sualı cavablandıran Y.Xanvəli deyib: “KİV-lərdə Türkiyənin Mardin vilayətinin Boğaziyyə kəndində toyuq və digər ev quşlarında "quş qripi"nin aşkarlanması ilə bağlı məlumat yayılıb. Lakin Ümumdünya Heyvan Sağlamlığı Təşkilatı və Türkiyənin rəsmi orqanları tərəfindən bizə bu barədə hər hansı məlumat daxil olmayıb. Buna baxmayaraq, KİV-lərdə yayılan məlumatlar diqqətdə saxlanılır. Belə ki, həmin bölgədən ölkəmizə diri quş, quş əti və quşçuluq məhsulları gətirilmir”.

Yolçu Xanvəli, həmçinin qeyd edib ki, Rusiyanın Kostroma vilayətində yerləşən quşçuluq fabrikində toyuqlarda “quş qripi”nin aşkarlanması ilə bağlı Ümumdünya Heyvan Sağlamlığı Təşkilatından məlumat alınıb. “Ümumiyyətlə, həmin bölgədən indiyədək ölkəmizə heç bir quşçuluq məhsulları gətirilməyib. Eləcə də 2017-ci ilin mart-aprel aylarında Moskva və Moskvaətrafı vilayətlərdə “quş qripi”nin aşkarlandığını nəzərə alaraq, həmin bölgələrə də müvəqqəti məhdudiyyət tətbiq edilib. Bu ərazilərdən ölkəmizə diri quş, quş əti və məhsulları idxal olunmur”, - deyə mətbuat xidmətinin rəhbəri vurğulayıb.

DBNX rəsmisinin sözlərinə görə, ölkəmizdə “quş qripi”nə görə vəziyyətin araşdırılması məqsədilə ötən il dörd monitorinq keçirilib. Monitorinqlər zamanı köçəri quşların müvəqqəti məskunlaşdığı ərazilərdən, eləcə də sənaye quşçuluğundan və şəxsi təsərrüfatlardan patoloji və qan nümunələri götürülüb, Respublika Baytarlıq Laboratoriyasında “quş qripi” və digər iti yoluxucu xəstəliklərə görə müayinə edilib. Müayinələr zamanı “quş qripi”nin hər hansı tipinə təsadüf olunmayıb. Hazırda “quş qripi” və digər iti yoluxucu xəstəliklərə görə respublikada epizootik vəziyyət sabitdir.