Moskva Çay Gəmiçiliyi İdarəsi 1934-cü ildə inşa edilmiş və “Stalinin yaxtası” kimi tanınan “Maskim Qorkiy” teploxodunu satışa çıxarıb.

 “Kommersant”ın verdiyi məlumatına görə, Moskva Çay Gəmiçiliyi İdarəsi bu teploxodu 20 mln. rubla və ya 600 min manata satmaq niyyətindədir. Potensial alıcılar arasında Azərbaycanın “Xəzər Dəniz Gəmiçiliyi” QSC-nin adı da var.

Moskva Çay Gəmiçiliyi İdarəsinin baş direktoru Konstantin Anisimov faktı təsdiqləyib və “Xəzər Dəniz Gəmiçiliyi” QSC, həmçinin Nijniy Novqorod administrasiyası ilə bununla bağlı danışıqların aparıldığını bildirib.

K.Anisimov qeyd edib ki, Azərbaycan üçün bu gəmi eksponat kimi maraqlıdır: “Bu gəmidə Dəniz Donanması muzeyi yaradılacaq. Belə ki, bu il “Xəzər Dəniz Gəmiçiliyi” QSC 160 illiyini qeyd edəcək”.

Qeyd edək ki, “Maksim Qorkiy” gəmisi 1934-cü ildə inşa edilib. Onun uzunluğu 69 metr, eni 13 metrdir. Teploxod 30 km/saat sürət yığa bilir. Teploxodun “Stalinin yaxtası” adlandırılmasına baxmayaraq, İosif Stalinin orada istirahət etməsi ilə bağlı heç bir fakt yoxdur. Ancaq 1935-ci ildə bu paroxodda Maksim Qorkinin istirahət etməsi ilə bağlı yayılan rəvayət də öz təsdiqini tapmayıb.

Məlumata görə, bu yaxtada müxtəlif illərdə SSKP-nin MK-nin məşhur simaları olan Lavrentiy Beriya, Lazar Karaqoviç, Qriqoriy Orjonikidze, Vyaçeslav Molotov, Nikita Xruşyov, Leonid Brejnev istirahət edib. 2000-ci illərdə teploxodda daxili otaqların yenidən qurulması işləri aparılıb, onun mühərriki və naviqasiya sistemi dəyişdirilib. 130 nəfər sərnişin və 19 nəfər heyətə malik “Maksim Qorkiy” banket və gəzinti gəmisi kimi istifadə edilib. 2014-cü ildən isə teploxod ancaq restoran kimi istismar edilib. Bu səbəbdən də Moskva Çay Gəmiçiliyi İdarəsi gəmini satmaq qərarına gəlib.

Məlumata görə, şirkət artıq bu ilin ilk rübündə satışla bağlı razılığa gəlmək niyyətindədir.

"Xəzər Dəniz Gəmiçiliyi" QSC-nin mətbuat katibi Mehman Mehdiyevin “APA-Economics”ə verdiyi xəbərə görə, “Xəzər Dəniz Gəmiçiliyi” QSC-nin adıçəkilən gəminin alınması ilə bağlı niyyəti var: “Lakin bununla bağlı son qərar verilməyib”.

© APA