ABŞ Senatında bu həftə səsverməyə çıxarılacağı gözlənilən vergi islahatı layihəsinin qəbul olunması və qüvvəyə minməsi halında, dövlət borcunu təxminən 1,4 trilyon dollar artıracağı bildirilib. Qeyd edək ki, Respublikaçıların "Vergi Güzəştləri və Məşğulluq haqqında" qanun layihəsi senatda müzakirə edilir.

 
"Marja" xəbər verir ki, ABŞ Konqresi Büdcə Ofisi (CBO) analiz hesabatını dərc edib.
 

Təşkilatın proqnozlarına görə, Senatda baxılan vergi təklifinin mövcud halı ilə qüvvəyə minməsi, ölkənin dövlət borcunun 2027-ci ilədək 1 trilyon 441 milyard dollar artmasına səbəb olacaq. Bu rəqəmin, mövcud vergi sisteminin davam etdirilməsi vəziyyətində isə 1 trilyon 463 milyard dollara çatması gözlənilirdi.
 

Vergi layihəsinin 60 əvəzinə 51 səslə qəbul edilməsinə imkan verəcək kompromis tətbiqi, Ağ Ev tərəfindən dəstəklənən vergi layihəsinin Demokratların dəstəyi olmadan keçməsinə imkan verə bilər.

 
KASIB VƏ ORTA TƏBƏQƏ DAHA ÇOX VERGİ ÖDƏYƏCƏK

 
Bəzi mənfi qiymətləndirmələrin də yer aldığı hesabatda, Senatdakı vergi layihəsinin qanuniləşməsi vəziyyətində ölkədəki ən kasıb və orta təbəqə ödəyicilərin daha çox vergi ödəmək məcburiyyətində qalacağı bildirilib.

 
Bundan başqa, məcburi tibbi sığortanın ləğvini nəzərdə tutan layihəsinin həyata keçməsi halında səhiyyə sığortası xərclərinin mövcud sistemə nisbətən 10 faizdən çox yüksələcəyi qeyd edilib.

Hesabatda, ölkədə sığortasız adam sayının 2019-da 4 milyon, 2027-ci ildə isə 13 milyon artacağı proqnozuna da yer verilib.

 
CBO-nun sözügedən hesabatı, vergi qanunlarının 30 ildən çox müddətdir ilk dəfə dəyişdirilməsini nəzərdə tutan vergi islahatına qarşı müxalifətin əlini gücləndirib.
 

Demokratlar "Vergi Güzəştləri və Məşğulluq haqqında" qanununa zənginlərə və şirkətlərə fayda verəcəyi səbəbindən qarşı çıxırlar.
 

Bundan başqa, bəzi Respublikaçı senatorların müxalifətə qoşulması, qanun layihəsinin gələcəyinə dair qeyri-müəyyənliyi artırıb. Bu ana qədər layihəni dəstəkləməyəcəyini bildirən Respublikaçı senator sayı 4 nəfərdir..