Noyabr ayının 14-də Azərbaycan Respublikası kənd təsərrüfatı nazirinin müavini Seyfəddin Talıbov İsrail Dövlətinin Azərbaycan Respublikasındakı Fövqəladə və Səlahiyyətli səfiri Dan Stav ilə görüşüb.

Görüşdə məqsəd iki ölkə arasında kənd təsərrüfatı sahəsində gələcək əməkdaşlıq imkanlarının müzakirəsi olub.

Nazir müavini Seyfəddin Talıbov İsrailin suvarma sahəsində yüksək təcrübəyə malik olduğunu və Azərbaycanda bu təcrübənin tətbiqinin əhəmiyyətini qeyd edib. Bildirib ki, Azərbaycan 2005-ci ildən indiyədək İsraildən suvarma avadanlıqları, o cümlədən İsrail-Türkiyə birgə istehsalı olan bir çox avadanlıqlar alıb.

Nazir müavini İsraildə səfərdə olarkən İsrailin kənd təsərrüfatı naziri, həmçinin kənd təsərrüfatı sahəsində aparıcı şirkətlərin nümayəndələri ilə görüşdüklərini və qarşı tərəfində aqrar sahədə əməkdaşlıqda maraqlı oduğunu qeyd edib.

İki ölkə arasında aqrar sahədə əməkdaşlığın hüquqi bazasının yaradılması məqsədilə “Azərbaycan Respublikasının Kənd Təsərrüfatı Nazirliyi ilə İsrail Dövlətinin Kənd Təsərrüfatı və Kəndin İnkişafı Nazirliyi arasında kənd təsərrüfatı sahəsində əməkdaşlıq haqqında Saziş”in 2016-cı ilin 13 dekabr tarixində Bakı şəhərində imzalandığını diqqətə çatdırıb. Bundan sonra əməkdaşlığa daha da genişləndirmək üçün konkret sahələr- baytarlıq, fitosanitar və digər sahələr üzrə sazişlərin imzalanmasını məqsədəuyğun hesab edib. Nazir müavini həmçinin İsrailin “MAŞAV” təşkilatının xətti ilə Azərbaycanın kənd təsərrüfatının müxtəlif sahələrində çalışan mütəxəssislərin bu ölkədə bir sıra təlimlərdə iştirak etdiyini qeyd edib.

Seyfəddin Talıbov hal-hazırda ölkəmizdə sağlam və keyfiyyətli toxum istehsalının təşkil edilməsi, toxumçuluqda elmi-praktiki biliklərin genişləndirilməsi və eyni zamanda bu sahədə idxaldan asılılığın azaldılması məqsədilə İsrail Dövlətinin bu istiqamətdə ixtisaslaşan şirkətləri ilə əməkdaşlıq əlaqələrinin qurulduğunu və bu şirkətlə tərəvəz toxumçuluğunun istehsalı ilə bağlı layihənin həyata keçirilməsinin nəzərdə tutulduğunu vurğulayıb.

Nazir müavini korporasiya və informasiya məsləhət xidməti, həmçinin elmi nəticələrin fermer təsərrüfatlarında tətbiqi sahələrində İsrail Dövləti ilə əməkdaşlığı məqsədəuyğun hesab edib.

Səmimi qəbula görə minnətdarlığını bildirən səfir Dan Stav İsrailin kənd təsərrüfatı sahəsində yüksək təcrübəyə malik olduğunu və bu əməkdaşlığı inkişaf etdirmək üçün həm hüquqi, həm də iqtisadi tərəfdən bazanın olduğunu nəzərə çatdırıb. Səfir mütəmadi olaraq Azərbaycanın bölgələrinə səfər etdiyini, Azərbaycanda kənd təsərrüfatının inkişafı üçün böyük işlər görüldüyünü, müasir kənd təsərrüfatı sisteminin qurulduğunu və xarici təcrübədən bəhrələnməklə bu sahənin inkişafı üçün böyük potensial imkanların olduğunu diqqətə çatdırıb.

Səfir iki ölkə arasında kənd təsərrüfatının daha da inkişafı məqsədilə öz səylərini əsirgəməyəcəyini bildirib.

Sonra qarşılıqlı maraq doğuran məsələlər üzrə geniş fikir mübadiləsi aparılıb.