Dünya bazarında neftin qiyməti 55 dollar/bareldən yuxarı qalmağa davam edərsə, 2018-ci ilin fevral ayından etibarən Azərbaycanda dolların rəsmi məzənnəsi 1,60 AZN/USD-yə düşə bilər.

Yerli analitiklər bildirir ki, Azərbaycanın xarici ticarət göstəriciləri, tədiyyə balansı, inflyasiya və iqtisadi artım perspektivləri manatın möhkəmlənməsi üçün əsas təşkil edir.

Belə ki, neftin bahalaşması xarici ticarətin müsbət saldosunu getdikcə artırır. Bu zaman, dolların bir qədər ucuzlaşdırılaraq idxalın artırılması və büdcə gəlirlərinin yüksəldilməsi mümkündür. Nəzərə almalıyıq ki, Azərbaycan hələ də əsas strateji malları xaricdən idxal edir.

"Tədiyyə balansına gəldikdə isə, bu ilin II rübündə 967 mln. dollarlıq müsbət saldo əldə olunub. III rübdə bu göstəricinin 1,2 mlrd. dollara yüksələcəyini proqnozlaşdırırıq. Əgər belə olarsa, Azərbaycanın tədiyyyə balansının müsbət saldosu 2014-cü ilin II və III rübünün göstəricisinə, yəni böhrandan əvvəlki rəqəmlərə yaxınlaşacaq. Xatırladaq ki, o zaman tədiyyə balansı müvafiq olaraq 1,59 mlrd. və 1 mlrd. dollar müsbət saldoyla nəticələnib", - deyə analitiklər qeyd ediblər.

İnflyasiya göstəricisi nəzərə alındıqda isə, dolların məzənnəsində geriləmə amili xüsusi önəm daşıyır. Belə ki, hazırda 14%-ə yaxın olan inflyasiya göstəricisinin geriləməsi üçün dolların məzənnəsində ucuzlaşma baş verməlidir: "İqtisadi artımla bağlı göstəriciyə dolların məzənnəsinin ucuzlaşması müsbət təsir göstərir. Belə ki, dolların ucuzlaşması nəticəsində inflyasiya geriləyir, bu da öz növbəsində əhalinin real gəlirlərini artırır. Əhali də öz növbəsində istehlak xərclərini artıraraq iqtisadi artıma müsbət təsir göstərir".

Analitilər hesab edir ki, dollarda ucuzlaşma ehtimallarına baxmayaraq, Azərbaycan Mərkəzi Bankı (AMB) dövriyyədə olan manat kütləsinə nəzarəti əldən verməyəcək. Digər tərəfdən, onsuz da banklar sərt şərtlər çərçivəsində kreditləşmənin həcmini artıra bilmir. Bu da onu deməyə imkan verir ki, dollara tələbat, inflyasiya və iqtisadi artım hədəfləri AMB tərəfindən tam nəzarətdə olacaq.

© Report