Göyçay rayonunda nar bağlarında məhsul yığımı davam edir. Toplanan məhsulun bir hissəsi yerli və xarici bazara çıxarılır, qalan hissəsi isə istehsal müəssisələrinə verilir. Bölgənin ən böyük nar emalı müəssisəsi olan və dünyanın 26 ölkəsi ilə iqtisadi əlaqələr quraraq məhsul ixrac edən “AzNar” QSC hazırda nar qəbulu və istehsalı mövsümünün başlanması ilə əlaqədar ikinövbəli iş rejiminə keçib.

Məhsullarını dünya bazarına “Grante” brendi ilə satışa çıxaran müəssisə hər gün Göyçay, Sabirabad, Kürdəmir, Ağsu, Ucar, Hacıqabul, Zərdab və Ağdaş rayonlarından 200 ton nar qəbul edir. Hazırda mövsümlə əlaqədar müəssisədə əlavə 80 nəfər işçi çalışır. Həmçinin zavodun həmin rayonlarda nar qəbulu məntəqələri yaradılıb ki, orada çalışan insanlar kəndlərdən məhsul toplamaqla məşğuldur. Bu da kəndlərdə 100-dən çox mövsümi iş yerinin açılması deməkdir.

Cari ilin məhsul qəbulu və istehsalı üçün bütün avadanlıqlar saz vəziyyətə gətirilib. Bir neçə gün öncə “AzNar” QSC kənd zəhmətkeşləri və fermerlərdən narın hər kiloqramını 13 qəpiyə alırdısa, indi qiyməti 23 qəpiyə yüksəldib.

Zavodun icraçı direktoru Fərəc Əhmədov bildirib ki, müəssisədə “yaşıl istehsal” texnologiyasının tətbiqi nəticəsində “AzNar” QSC-də nar şirəsi, nar-şərab, qatılaşdırılmış nar şirəsi, alma, heyva və feyxua şirələri istehsal olunur.

Rayonda meyvəçiliyin inkişafına təkan verən “AzNar” QSC indiyədək 1160 hektar sahədə yeni nar, 15 hektar sahədə isə xurma, gilas və ərik bağı salıb. Meyvə bağlarına 200 işçi qulluq edir.

2011-ci ildən zavodda tullantısız nar emalı kimi yeni texnologiya tətbiq olunub. Nəticədə narın qabığından tanin maddəsi, tumundan isə yüksək dərəcəli yağ əldə edilir. Zavodda heç bir qatqısı olmadan təbii yolla hazırlanan nar şirələri indiyədək müxtəlif ölkələrdə keçirilən beynəlxalq qida məhsulları sərgisində 5 qızıl medal qazanıb.

© Azərtac