APFM üzvlərinin maarifləndirilməsi istiqamətində aparılan işlərin davamı kimi Azərbaycan Professional Maliyyə Menecerləri Assosiasiyası tərəfindən 11 oktyabr 2017 tarixində Bakı şəhərində Royal mehmanxanasında Assosiasiyanın üzvləri üçün “Maliyyə hesabatları əsasında müəssisənin maliyyə təhlili necə aparılır?” mövzusunda keçirilən növbəti seminar uğurla başa çatıb.

Bu barədə "Marja"ya Assosiasiyadan bildirilib.

Seminar SOCAR-ın nümayəndəsi, Kəmaləddin Quliyevin təqdimatında keçirilib.

"Seminarda maliyyə təhlilinin məqsədi, informasiya mənbəyi, məcmu gəlirlər haqqında hesabat üzrə, balans hesabatı üzrə, pul vəsaitinin hərəkəti haqqında hesabat üzrə müəssisənin maliyyə təhlilinin aparılması və maliyyə təhlilinin aparılma üsulları geniş müzakirə olundu, iştirakçıları maraqlandıran suallar cavablandırıldı",- məlumatda bildirilir.

Qeyd edək ki, Assosiasiya 2013-cü ildə beynəlxalq təcrübəyə əsaslanaraq Azərbaycanda ilk dəfə olaraq üzvlük sistemini tətbiq etmişdir və artıq 4 il müddətində ciddi irəliləyişlər və nailiyyətlər əldə olunmuşdur və hazırda da fəaliyyətini uğurla davam etdirir.

01 mart 2016 tarixindən etibarən isə APFM- Avropa Mühasiblər və Auditorlar Federasiyasına (EFAA) üzv qəbul olunmuşdur. Bu isə Assosiasiyanın nüfuzunu bir daha artıraraq bu sahədə fəallığının, xüsusilə də üzvlərinin peşəkarlıq səviyyəsindən artırılması, yeniliklərə, yeni çağırışlara cavab verməyə qadir olmaları istiqamətində inkişafını labud edir.

Hazırda Azərbaycan özünün yeni inkişaf mərhələsinə qədəm qoyur. Bu mərhələnin əsas hədəfi coxşaxəli, səmərəli və innovasiya yönümlü iqtisadiyyatın formalaşdırılması, onun qurluşunun şaxələndirilməsi, bütün səviyyələrdə məhsuldarlığın, digər səmərəlilik göstəricilərinin yaxşılaşdırılması əhalinin rifahının layiqli, qabaqcıl beynəlxalq standartlara uyğun səviyyəyə çatdırılması təşkil edir.

Ölkəmizdə aparılan iqtisadi islahatlar qlobal iqtisadi çağırışlara konseptual yanaşmalarla daha da təkmilləşdirilməkdədir. Son illərdə düşünülmüş, qabaqlayıcı tədbirlər, qanunvericilik bazasının möhkəmləndirilməsi, milli maraqların qorunması istiqamətində atılan cəsarətli addımlar ölkə iqtisadiyyatının ahəngdar fəaliyyəti üçün mühüm rol oynamışdır. Bu sahədə qəbul edilmiş çoxsaylı qanun və digər normativ aktların standartlarına riayyət etmək üçün isə mütəxəssislərimizdən daima innovatorluq , peşəkarlıq, qabaqcıl təcrübənin öyrənilməsi tələb olunur.