Azərbaycan Mikromaliyyə Assosiasiyası (AMFA) 11 noyabr 2026-cı il tarixində, saat 11:00–12:30-da Türkiyənin Antalya şəhərində keçirilən COP31 çərçivəsində Azərbaycan Pavilyonunda “İqlim dəyişikliklərinə uyğunlaşma üçün maliyyə resurslarının ən ucqar və həssas əhali qruplarına çatdırılması” mövzusunda seminar təşkil edəcək.

Seminarda beynəlxalq iqlim maliyyəsi institutlarının, inkişaf tərəfdaşlarının, investorların, mikromaliyyə təşkilatlarının və digər maraqlı tərəflərin nümayəndələri iştirak edərək, aztəminatlı ailələr, kiçik fermer təsərrüfatları və mikro sahibkarlar üçün iqlim dəyişikliklərinə uyğunlaşma məqsədli maliyyə resurslarının daha əlçatan və sərfəli olmasına yönəlmiş praktik həll yollarını müzakirə edəcəklər.

Müzakirələr qlobal iqlim maliyyəsi ilə yerli maliyyə institutları arasında əlaqələrin gücləndirilməsi, innovativ maliyyələşdirmə mexanizmləri, qarışıq maliyyələşdirmə modelləri, risklərin bölüşdürülməsi alətləri və iqlim dəyişikliklərinə uyğunlaşmanın təsirinin qiymətləndirilməsi istiqamətlərini əhatə edəcək.

Seminarın əsas məqsədi mikromaliyyə təşkilatları və digər inklüziv maliyyə xidmətləri göstərən qurumlar vasitəsilə iqlim maliyyəsinin həssas əhali qruplarına çatdırılmasını təmin edən dayanıqlı və geniş miqyasda tətbiq oluna bilən maliyyələşdirmə modellərinin müəyyən edilməsidir.

Bu təşəbbüslə AMFA maliyyə inklüzivliyinin, dayanıqlı maliyyələşdirmənin və iqlim dəyişikliklərinə qarşı davamlılığın gücləndirilməsinə sadiqliyini bir daha nümayiş etdirir, eyni zamanda beynəlxalq iqlim maliyyəsi təminatçıları ilə yerli maliyyə institutları arasında əməkdaşlığın inkişafına töhfə verməyi hədəfləyir.

AMFA bütün maraqlı tərəfləri seminarda iştirak etməyə və iqlim dəyişikliklərinə uyğunlaşmanın maliyyələşdirilməsi üzrə praktik həll yollarının müzakirəsinə qoşulmağa dəvət edir.

Tədbir haqqında məlumat:

• Tarix: 11 noyabr 2026-cı il
• Saat: 11:00–12:30 (Türkiyə vaxtı ilə)
• Məkan: Azərbaycan Pavilyonu, COP31, Antalya, Türkiyə
• Təşkilatçı: Azərbaycan Mikromaliyyə Assosiasiyası (AMFA)

Əlavə məlumat üçün:

Veb-sayt: https://amfa.az/

E-poçt: administration@amfa.az