Fransanın “Crédit Mutuel Arkéa” bank qrupu kiberhücuma məruz qaldığını təsdiqləyib. Hücum nəticəsində 133 milyon ABŞ dollarından çox vəsaitin oğurlandığı iddia olunur. Bank hadisənin nəzarət altına alındığını və müştərilərin maliyyə maraqlarının qorunduğunu açıqlayıb.

Marja.az xəbər verir ki, bu barədə “CoinDesk” nəşri məlumat yayıb.

Kriptovalyuta əməliyyatları, maliyyə fırıldaqçılığı və çirkli pulların yuyulması hallarını araşdıran ZachXBT adlı müstəqil blokçeyn tədqiqatçısı Fransa bankının ən azı 133 milyon dollar məbləğində vəsaitin oğurlanması ilə nəticələnən hücumun hədəfinə çevrildiyini bildirib.

Tədqiqatçının məlumatına görə, şübhəli əməliyyatlar bir neçə gün davam edib.

ZachXBT əvvəlcə 106 milyon dollardan çox şübhəli köçürmə müəyyən etdiyini, sonradan isə əlavə 27 milyon dollarlıq əməliyyat aşkarladığını açıqlayıb.

Onun sözlərinə görə, birjadankənar kriptovalyuta əməliyyatları da nəzərə alınarsa, oğurlanan vəsaitin ümumi məbləği daha yüksək ola bilər.

30 milyon dollardan çox vəsaitin yuyulduğu iddia edilir

ZachXBT bankın hadisə barədə müvafiq qurumları məlumatlandırmaqda gecikdiyini iddia edib.

Onun sözlərinə görə, bu gecikmə hücum edən şəxslərə 30 milyon dollardan çox vəsaiti müxtəlif kriptovalyuta platformaları vasitəsilə leqallaşdırmağa imkan yaradıb.

Tədqiqatçı hesab edir ki, aidiyyəti Avropa qurumlarına daha erkən xəbərdarlıq edilsəydi, həmin vəsaitlərin bir hissəsinin dondurulması mümkün ola bilərdi. Lakin bu iddialar müstəqil şəkildə təsdiqlənməyib.

Bank kiberhücumu təsdiqləyib

“Crédit Mutuel Arkéa” bank qrupundan verilən açıqlamada kiberhücum nəticəsində saxta maliyyə əməliyyatlarının həyata keçirildiyi təsdiqlənib.

Bankın bildirdiyinə görə, hadisə aşkarlandıqdan sonra təhlükəsizlik tədbirləri görülüb və əlavə qanunsuz köçürmələrin qarşısını almaq məqsədilə bəzi əməliyyatlar müvəqqəti dayandırılıb. Hazırda vəziyyətin nəzarət altına alındığı bildirilir. Bank oğurlandığı iddia edilən vəsaitin məbləğini açıqlamayıb.

Maliyyə qurumunun nümayəndəsi hadisənin müştərilər üçün maliyyə nəticələrinin olmadığını və onların maraqlarının tam qorunduğunu bildirib.

Kriptovalyuta platformalarında şübhəli əməliyyatlar aşkarlanıb

Blokçeyn analitikası şirkəti “Bitquery”nin araşdırmasına əsasən, noyabrın 1–2-də “Kraken”, “Crypto.com” və “OKX” platformalarındakı hesablardan 108,8 milyon dollar məbləğində USDC kriptovalyutasının çıxarılması izlənilib.

Araşdırmada vəsaitlərin yüzlərlə kriptovalyuta ünvanı arasında köçürüldüyü və bir hissəsinin digər rəqəmsal aktivlərə çevrildiyi müəyyən edilib.

“Crypto.com” hadisə ilə əlaqəli vəsaitlərin platforma vasitəsilə hərəkətinin qarşısını almaq üçün müvafiq məhdudiyyətlər tətbiq etdiyini açıqlayıb.

Şirkət istifadəçilərin vəsaitlərinin təhlükəsiz və əlçatan olduğunu bildirib.

Hücum edən şəxslərin bankın və ya əlaqəli hesabların sistemlərinə hansı üsulla giriş əldə etdikləri hələ müəyyənləşdirilməyib.

Hadisə ilə bağlı araşdırmalar davam edir.