OPEC+ alyansının yeddi aparıcı üzvü 2026-cı ilin dekabr ayında neft hasilatı üzrə mövcud kvotaları dəyişməmək barədə qərar qəbul edib. Bununla da iştirakçı ölkələr ardıcıl dördüncü ay hasilat limitlərini sentyabr səviyyəsində saxlayacaqlar.

Marja.az xəbər verir ki, bu barədə Neft İxrac Edən Ölkələr Təşkilatının (OPEC) noyabrın 1-də yaydığı rəsmi məlumatda bildirilir. 

Noyabrın 1-də Səudiyyə Ərəbistanı, Rusiya, İraq, Küveyt, Qazaxıstan, Əlcəzair və Oman nümayəndələrinin iştirakı ilə videokonfrans formatında görüş keçirilib.

Görüşdə qlobal neft bazarındakı mövcud vəziyyət, tələb və təklif perspektivləri, eləcə də hasilat siyasəti müzakirə olunub.

Müzakirələrin nəticəsi olaraq yeddi ölkə 2026-cı ilin sentyabr ayı üçün müəyyən edilmiş neft hasilatı səviyyələrinin dekabr ayında da qüvvədə saxlanılması barədə razılığa gəlib.

Səudiyyə Ərəbistanı və Rusiya üçün hasilat kvotaları dəyişməyib

Qərara əsasən, yeddi ölkənin dekabr ayı üzrə ümumi gündəlik hasilat kvotası 31 milyon 10 min barel səviyyəsində saxlanılacaq.

Ölkələr üzrə gündəlik hasilat limitləri aşağıdakı kimidir:

Ölkələr üzrə gündəlik hasilat kvotası:

Səudiyyə Ərəbistanı: 10 milyon 478 min barel

Rusiya: 9 milyon 949 min barel

İraq: 4 milyon 431 min barel

Küveyt: 2 milyon 676 min barel

Qazaxıstan: 1 milyon 628 min barel

Əlcəzair: 1 milyon 7 min barel

Oman: 841 min barel

Cəmi: 31 milyon 10 min barel

Qeyd edək ki, göstəricilər təsdiqlənmiş hasilat kvotalarıdır və faktiki neft hasilatını əks etdirmir. 

Beləliklə, ən yüksək hasilat kvotası Səudiyyə Ərəbistanına, ikinci ən böyük kvota isə Rusiyaya məxsusdur. Bu iki ölkənin ümumi gündəlik hasilat limiti 20 milyon 427 min barel təşkil edir.

OPEC+ hasilat artımına fasiləni davam etdirir

Qeyd edək ki, iştirakçı ölkələr 2023-cü ildə razılaşdırılmış əlavə könüllü hasilat azalmalarının bir hissəsini 2026-cı ilin sentyabr ayınadək mərhələli şəkildə aradan qaldırıblar.

Avqustun 2-də keçirilmiş görüşdə sentyabr üçün gündəlik hasilatın əlavə 188 min barel artırılması razılaşdırılmışdı. Lakin sonrakı iclaslarda oktyabr, noyabr və dekabr ayları üçün yeni artım nəzərdə tutulmayıb. 

Reuters-in məlumatına görə, alyansın qərarı Yaxın Şərqdəki münaqişənin neft tədarükünə təsir göstərdiyi və ixrac marşrutlarında qeyri-müəyyənliyin davam etdiyi bir şəraitdə qəbul olunub. Bir sıra iştirakçı ölkələrin faktiki hasilatı müəyyən edilmiş kvotalardan aşağı qalır. 

OPEC+ ölkələri 2023-cü ilin aprel və noyabr aylarında elan etdikləri əlavə könüllü hasilat tənzimləmələrinə, eləcə də Əməkdaşlıq Bəyannaməsi çərçivəsində götürülmüş öhdəliklərin tam yerinə yetirilməsinə sadiq olduqlarını bir daha təsdiqləyiblər.

Təşkilatın açıqlamasına əsasən, yeddi ölkə neft bazarındakı vəziyyəti qiymətləndirmək məqsədilə aylıq görüşlərini davam etdirəcək.

Növbəti görüşün 29 noyabr 2026-cı ildə keçirilməsi planlaşdırılır.

Hər gün yeni vakansiyalar - AzVak.az-da