Dünya bazarında qızılın qiyməti son bir ilin ən aşağı səviyyəsinə düşdükdən sonra yenidən yüksəlməyə başlayıb. Qiymətli metal 2008-ci ildən bəri ən zəif oktyabr ayını başa vurduqdan sonra investorların aşağı qiymətlərdən alışları hesabına itkilərinin bir hissəsini kompensasiya edib.

Marja.az xəbər verir ki, noyabrın 2-də qızılın qiyməti 0,9%-dək artaraq bir troya unsiyası üçün 3900 ABŞ dollarını keçib Bakı vaxtı ilə saat 08:14-də 3907,80 dollar olub.

Oktyabrın 30-da qızılın qiyməti 3,7% ucuzlaşaraq son bir ilin minimumuna (3874,40 dollar) geriləmişdi. Bu kəskin eniş qiymətli metal bazarında satış təzyiqinin gücləndiyini göstərib. Oktyabr ümumilikdə qızıl üçün 2008-ci ildən bəri ən uğursuz eyniadlı ay olub. 

Neftin ucuzlaşması qızıla dəstək verib

Qızılın qiymətinin bərpasına təsir göstərən əsas amillərdən biri dünya bazarında neftin ucuzlaşması olub. Neft qiymətlərində geriləmə inflyasiya ilə bağlı narahatlıqları müəyyən qədər zəiflədərək qiymətli metallara marağı artırıb.

ABŞ-da noyabrın 3-də keçiriləcək aralıq seçkiləri ərəfəsində Vaşinqtonun İranla bağlı mövqeyi də bazar iştirakçılarının diqqət mərkəzindədir. Axios-un məlumatına görə, ABŞ Prezidenti Donald Tramp İrana qarşı hərbi əməliyyatların yenidən başlanmasına dair qərar qəbul etməzdən əvvəl diplomatik səylərə daha çox vaxt vermək niyyətindədir.

Bununla belə, Yaxın Şərqdə münaqişənin yenidən şiddətlənməsi riski qalmaqdadır. Tramp daha əvvəl aralıq seçkilərindən sonra İrana qarşı zərbələrin bərpa oluna biləcəyi barədə xəbərdarlıq edib. Tehran isə belə addımlara daha genişmiqyaslı cavab verəcəyini bildirib. Fars körfəzi ölkələri də mümkün yeni hücumların regionda daha dağıdıcı müharibəyə səbəb ola biləcəyindən narahatdır.

Texnologiya şirkətlərinin səhmlərindəki eniş qızıla da təsir edir

Qlobal fond bazarlarında, xüsusilə texnologiya sektorunda müşahidə olunan kəskin ucuzlaşma qiymətli metallar bazarına əlavə təzyiq göstərir. Süni intellekt sahəsində fəaliyyət göstərən şirkətlərin səhmlərinin dəyər itirməsi bəzi investorları digər aktivlər üzrə zərərlərini qarşılamaq və likvidlik ehtiyaclarını ödəmək üçün qızıl ehtiyatlarını satmağa məcbur edir.

Bu vəziyyət ənənəvi olaraq təhlükəsiz investisiya aləti hesab edilən qızılın da genişmiqyaslı satış dalğasından təsirləndiyini göstərir.

Bununla belə, bazar ertəsi satış təzyiqi müəyyən qədər zəifləyib. Asiya fond bazarlarında ucuzlaşma ABŞ-ın Wall Street birjaları ilə müqayisədə daha məhdud olub.

Analitiklər qızılın qiymətində yeni eniş riskini istisna etmirlər

Global X ETFs şirkətinin strateqi Castin Lin bildirib ki, qızılın hazırkı qiymətini əlverişli hesab edən uzunmüddətli investorların alışları bazara qısamüddətli dəstək verir. Onun sözlərinə görə, investorlar və ehtimal ki, mərkəzi banklar qiymətlərin aşağı düşməsindən istifadə edərək qızıl mövqelərini ehtiyatla artırırlar.

Bununla belə, strateq qiymətli metalın hazırda riskli qiymət səviyyələrində olduğunu vurğulayıb. Saxo Bank-ın əmtəə strategiyası üzrə rəhbəri Ole Sloth Hansen isə hesab edir ki, bazarda likvidliklə bağlı narahatlıqlar və texniki xarakterli satışlar qızılın uzunmüddətli investisiya cəlbediciliyini kölgədə qoyur.

Analitikin qiymətləndirməsinə görə, qızılın qiymətinin 3886 dollardan aşağı bağlanması əlavə ucuzlaşma riskini artırır. Qısamüddətli bazar mənzərəsinin daha neytral xarakter alması üçün qiymətin yenidən 4000 dollardan yuxarı yüksəlməsi tələb olunur. 

Gümüş, platin və palladium da bahalaşıb

Qızılın ardınca digər qiymətli metalların qiymətlərində də bərpa müşahidə olunub.Cümə günü təxminən 6% ucuzlaşan gümüş bazar ertəsi 1,5% bahalaşaraq bir unsiya üçün 49,86 ABŞ dollarına yüksəlib.

Əvvəlki ticarət sessiyasında ciddi itkilərlə üzləşən platin və palladiumun qiymətləri də artıb. ABŞ dollarının əsas beynəlxalq valyutalara qarşı dinamikasını əks etdirən Bloomberg Dollar Spot İndeksi isə demək olar ki, dəyişməyib.

Bazar iştirakçılarının diqqəti qarşıdakı günlərdə ABŞ-dakı aralıq seçkilərinə, İran ətrafında geosiyasi vəziyyətə və qlobal fond bazarlarındakı dəyişikliklərə yönələcək.